Класічная камедыя з класічнай агучкай. Юбілейны фестываль «Кінемо» праходзіць у Гродне

Сёлета фестываль «Кінемо» прыехаў у Гродна пяты раз. Распачаўся ён па традыцыі камедыяй з агучкай класічнага тапера. Дарэчы, Гродна — адзіны горад пасля Мінску, дзе «Кінемо» праходзіць кожны год.

Штогод арганізатары стараюцца зрабіць рэпертуар больш разнастайным і не паўтарацца. Карацей, не Чарлі Чапліным адзіным. Але ёсць і пэўныя традыцыі. Напрыклад, адкрывае фестываль ва ўсіх гарадах камедыя з класічным таперам-піяністам. Гэтым разам гледачам паказалі фільм «Гоншчык» з Гаральдам Лойдам у галоўнай ролі. Гаральд Лойд — адзін са знакамітай тройкі комікаў, поруч з Чарлі Чаплінам і Бастарам Кітанам.

Агучваў фільм піяніст і кампазітар Юрый Бліноў. Ён мае вялікі канцэртны рэпертуар, а таксама з’яўляецца прэзідэнтам Міжнароднай арганізацыі піяністаў і кампазітараў ды сузаснавальнікам і арт-дырэктарам Міжнароднага конкурса юных музыкаў. Дарэчы, музыканты рыхтуюцца на фестывалю цэлых два месяцы. Яны праглядаюць спіс фільмаў, абіраюць той, які пасуе ім, і ствараюць музыку.

«Гэтыя фільмы не стануць нашымі любімымі»

— Калі ў 2014 годзе мы прыехалі сюды, не думалі, што фестываль стане штогадовым. Мы змянялі, намацвалі і зараз усё ідэальна. Гэта адбылося менавіта таму, што мы чулі вашыя водгукі. І цяпер не ўзнікае думкі, рабіць ці не рабіць, — звяртаюцца арганізатары да публікі.

Арганізатары кажуць, што ў Мінску ад публікі было менш жывой рэакцыі. А ў Гродне было шмат шчырага смеху. «Я ў Гродне адчувала іншую атмасферу, — кажа Марына Буткевіч, арганізатарка „Кінемо“. — Камерна, быццам да сваіх прыходзіш».

Чаму аўдыторыю ўвогуле цікавіць нямое кіно? «Мне здаецца, што цікаўнаму чалавеку будуць цікавыя розныя моманты развіцця мастацтва. Гэтыя фільмы не стануць нашымі любімымі. Але людзі ходзяць, каб стаць больш дасведчанымі», — кажа Марына. Каб зрабіць стужкі больш сучаснымі і «ажывіць» іх, ствараецца музычнае суправаджэнне. Фільмы агучваюць сучаснай музыкай: для музыкаў гэта новы вопыт, і для кіно — новае нараджэнне.

Што далей?

Гэта толькі першы дзень фестывалю. 7 ліпеня гледачоў чакае фільм «Жонка Фараона». Ён ствараўся ў 20-х гадах мінулага стагоддзя. І на той час здымкі былі вельмі маштабнымі. Для іх пабудавалі вялікія дэкарацыі старажытных егіпецкіх гарадоў. Фільм доўгі час быў згублены, яго знайшлі і рэканструявалі. А таксама ўручную расфарбоўвалі. Агучваюць яго будуць Кшыштаф Кіцёр (фартэпіяна), Віталь Эпаў (духавыя), Кацярына Пятрэнка (віяланчэль).

8 ліпеня — дзень караткаметражак з Чарлі Чапліным і Бастарам Кітанам пад агучку Five storey ensemble з фартэпіяна, духавымі і скрыпкай.