Дзясяты сезон працы УЗВ скончыўся выпускным балем

Гаўдэамус, падзякі і пасведчанні выпускнікам, спевы, танцы, падарункі, прывітальныя прамовы і святочны торт у «Бярозавым раі»: студэнты, выкладчыкі і арганізатары «Універсітэту Залатога Веку» развіталіся з юбілейным навучальным годам і пайшлі на летнія канікулы, піша uzv.by.

Каля ста ўдзельнікаў прыйшло на святочны баль, які праходзіў у аграсядзібе «Бярозавы рай» непадалёк ад Гродна, устаюць пад гукі студэнцкага гімна «Гаўдэамус», з якога традыцыйна распачынаецца і сканчаецца кожны акадэмічны год УЗВ.

— Кожны з нас, калі пачынае нейкую новую справу, трошачку баіцца. У 2010 мы не пабаяліся і зрабілі ўнікальны для Беларусі Універсітэт — універсітэт, дзе людзі ад 55 могуць атрымліваць патрэбныя веды і кампетэнцыі, універсітэт, дзе паляпшаецца іх здароўе, універсітэт, дзе ёсць магчымасць праявіць сябе не толькі ў ролі студэнта, але і выкладчыка і арганізатара цікавых справаў, вандровак, універсітэт, дзе сустракаюцца розныя пакаленні і вучацца адзін у аднаго, універсітэт, дзе жывуць напоўніцу — кажа дырэктарка праграмы Лана Руднік.

Сёлета арганізавана звыш 20 дабрачынных акцый, інтэграцыйных і культурніцкіх мерапрыемстваў. Сябры Рады зрабілі для ўсіх прыемны сюрпрыз, падрыхтаваўшы памятныя падарункі для кіраўніцтва і каманды УЗВ. Сёлета імі была праведзеная рэкордная колькасць заняткаў курсаў і клубаў - 1307.

Праца «Універсітэту Залатога Веку» адбываецца ў межах праекта «Паляпшэнне якасці жыцця людзей ваеннага пакалення праз актывізацыю і ўзаемадапамогу», падтрыманага Фондам Памяць, адказнась і будучыня" у межах праграмы «Месца сустрэчы: дыялог», якая каардынуецца Міжнародным грамадскім аб’яднаннем «Узаемапаразуменне».