Калі б у ліпені я не занялася сваім здароўем, а заадно і пахуданнем, не вытрымала б жнівеньскі поствыбарчы марафон з акцыямі пратэсту. За гэты месяц я выклалася па поўнай. Каб вярнуцца ў форму, бяру тайм-аўт і сыходжу ў лясы. Буду збіраць грыбы. Не вярнуся да тых часоў, пакуль белыя і мухаморы не пачнуць мне сніцца замест аўтазакаў.
Вагаў ў мяне з сабой няма. Сантыметровай стужкі таксама. Фітнес-бранзалет з крокамерам згубіўся. Ніякага кантролю за сітуацыяй не будзе. Я не ведаю, колькі ўдасца скінуць, і ці ўдасца наогул. Ні з кім са спецыялістаў свой грыбарэлакс я не ўзгадняла. Усё толькі пад маю адказнасць. Калі раптам спрацуе — запатэнтую потым партызанскі метад грыбапахудання.
Увесь тыдзень у мяне быў правільны рэжым. З раніцы — гадзінная прагулка ў лесе. Па папярэднім досведзе гэта каля 4−5 кіламетраў. Раніцай яшчэ раса і я шпацыравала па прасёлкавай дарозе з палкамі для скандынаўскай хады.
Пасляабедзенны фітнес складаўся з бязмэтнага хаджэння па лесе з нажом. Хаду дапаўнялі глыбокія нахілы і прысяданні па грыбы. Комплекс практыкаванняў заканчваўся пераноскай цяжараў - пакетаў са здабычай да дома. Ад такога фітнесу адмовіцца цяжка. Гэта вам не спартзала, дзе глядзіш на гадзіннік у чаканні канца трэніроўкі.
Пайшла ў лес — і пра час забылася. Азірнулася — а дзвюх гадзін як не бывала.
Вячэрняя прагулка самая кароткая — можна адарвацца ад камп’ютара і выйсці паглядзець на закат. Добра, што ў прыцемках грыбоў не відаць. Можна хутка вярнуцца назад.
Ні стравы без грыбоў - дэвіз гэтага тыдня. На сняданак у мяне яечня з грыбамі. На абед — гародніна з грыбамі. На вячэру — грыбны салат. Грыбы добра ідуць з мясам і з кашай. З памідорамі і з бураком. Іх можна заядаць пятрушкай і кропам. Смажыць з цыбуляй і тушыць з морквай. Ці падаваць пад соусам бешамель.
Пакуль толькі з грыбнымі дэсертамі без варыянтаў. Калі ў каго раптам ёсць рэцэпт дыетычнага грыбнога торта — з удзячнасцю прыму ў дар.
Яшчэ ўспомнілася, як дыетолаг казала пра стрэс, гармоны і пахуданне. Пакуль усё на нервах — карцізол і адрэналін не дадуць наладзіць нармальны абмен рэчываў. Спачатку трэба супакоіцца. Тады і пахуданне пачнецца.
Гриботерапия вельмі добра супакойвае нервы. І нож у руках — таксама.
Лес вакол зялёны, неба сіняе. Самыя правільныя колеры. Вакол цішыня. Ночы чорныя. Грыбы белыя. Гармонія вяртаецца ў свет.
Здаецца, я так супакоілася, што магу не хвалявацца за пахуданне. Ужо і так добра. Асабліва, пакуль у лесе і ніхто не бачыць.
Чытай больш:
Пакуль Воля і Зміцер Фурманавы чакаюць дзіця, іх уласная справа ўжо нарадзілася. Сям’я з Гродна…
Кавярні Гродна прапануюць класічныя летнія напоі для тых, хто любіць звыклыя смакі і гатовы эксперыментаваць:…
Заснавальніка анарха-панк-гурта Deviation Стаса Пачобута затрымлівалі яшчэ да прыходу да ўлады Лукашэнкі. Аднойчы чвэрць года…
Мінская гарадская жыллёвая гаспадарка (МГЖГ) нацякнула аб пераходзе на двухкантэйнерную сістэму збору камунальных адходаў. Эколагі…
Апошнія некалькі месяцаў расце колькасць нелегальных мігрантаў, якія праз нашу краіну спрабуюць трапіць у ЕС.…
Больш за 300 артыстаў на канцэрце, 180 удзельнікаў культурнай праграмы ў 100 павільёнах ад 15…