Укладуць у рэканструкцыю $ 10 млн: што чакае гродзенскае «Юнацтва»

Рэканструкцыю палаца культуры «Юнацтва» на Урублеўскага, 33 плануюць пачаць у жніўні 2023. Як будуць аднаўляць аб’ект, даведаўся канал Urban Hrodna.

На распрацоўку праектна-сметнай дакументацыі выдаткуюць 420,78 тыс. руб. з гарадскога бюджэта. Максімальная сума, якую збіраюцца інвеставаць у рэканструкцыю — 24 млн руб. Вясной на капрамонт палаца планавалі выдаткаваць менш — 8,43 млн руб., і збіраліся скончыць рамонт цягам 2023 г. Зараз уласнік будынка — Гродзенскі гарадскі цэнтр культуры — шукае генпраекціроўшчыка.

Што будзе ўнутры

Праект рэканструкцыі прадугледжвае і архітэктурныя змены, і пераабсталяванне палацу культуры. Ён мусіць улічыць працу:

• механічнага абсталявання і адзення сцэны;
• сістэмы гукаўзмацнення залы і фае;
• пастановачнага асвятлення залы і фае;
• сістэмы рэжысёрскай сувязі, гукавай трансляцыі, відэаназірання і кіравання;
• сістэмы відэаадлюстравання.

Асобна распрацуюць дызайн-праект для глядацкай залы, хола і вестыбюля.

Чытайце таксама: У Гродне адрамантуюць Палац культуры «Юнацтва», у якім 12 гадоў не было канцэртаў

Паводле перадпраектнай дакументацыі, на сцэне ўладкуюць светладыёдны экран 10,24*5,76 м, светладыёдны арлекін (паласа зверху) 12*0,5 м, дзве светладыёдныя кулісы 2*7 м і дзве адкатныя светладыёдныя кулісы 1,5*6,5 м. У фае размесцяць светладыёдны экран 3,84*2,24 м, 8 акустычных сістэм і абсталююць месцы гука- і відэааператараў.

У палацы прадугледжаны канферэнц-сістэма, сістэмы для відэапрагляду і сінхроннага перакладу, відэастудыя, абсталяванне для запісу, апрацоўкі і трансляцыі відэа ў інтэрнет, якое магчыма будзе выкарыстоўваць і на выяздных мерапрыемствах, кабінет гуказапісу.

Што будуць рабіць з будынкам

Індывідуальны праект рэканструкцыі мусіць прадугледзець 4 чаргі будаўніцтва.

I чарга:

• рэканструкцыя і інжынернае забеспячэнне глядзельнай залы і сцэны з прылеглымі памяшканнямі,
• дах над імі,
• усталёўка 2-х кран-бэлек для загрузкі дэкарацый,
• магчымасць безбар’ернага доступу на 1-ы паверх (да глядзельнай залы, санвузлоў, касы, у фае і гардэроб),
• замена вітража ў фае 2-га паверха,
• пракладка камунікацый для падлучэння тэхналагічнага абсталявання сцэны і залы,
• перакладка вонкавых сетак электразабеспячэння,

ІІ чарга:

• тэхналагічнае абсталяванне сцэны і залы, мантаж і пусканаладачныя працы.

III чарга:

• фасады будынка з заменай аконных блокаў і вітражоў, з улікам размяшчэння інфармацыйнага табло,
• астатняя частка даху будынка,
• абсталяванне некапітальнага, неацяпляемага павільёна для захоўвання элементаў мабільнай сцэны, дэкарацый і абсталявання.

IV чарга:

• перакладка вонкавых сетак (за выключэннем сетак электразабеспячэння),
• аднаўленне добраўпарадкавання.

На час рэканструкцыі не збіраюцца перапыняць эксплуатацыю астатняй часткі будынка.

Як зменіцца тэрыторыя вакол палаца

Таксама у межах рэканструкцыі ў двары палаца збіраюцца збудаваць асобны некапітальны павільён для захоўвання частак мабільнай сцэны і дэкарацый.

Паводле папярэдняга праекта, за палацам з боку царквы ўладкуюць паркоўку на 50 месцаў, з боку жылых дамоў - яшчэ на 8 аўто і дадаткова 2 месцы для кіроўцаў з інваліднасцю. Паміж палацам і паркоўкай будзе дзіцячая пляцоўка. Збоку ад вялікай паркоўкі размесцяць кантэйнерную пляцоўку.

Стан «Юнацтва»

Трохпавярховы палац «Юнацтва» збудаваны ў 1976 г. Агульная плошча будынка — 5620 кв.м. Глядацкая зала разлічана на 540 месцаў. З часу пабудовы механіку сцэны ні разу не абнаўлялі і не мадэрнізавалі, рэканструкцыі будынка таксама не было. Паводле дэфектных актаў, зношванне будынка складае 22%, большасці абсталявання і сантэхнікі - 65−80%, сістэмы водазябеспячэння — 25%.

Апошні канцэрт там прайшоў 12 гадоў таму. Апошнія гады будынак належаў ГрДУ, вясной 2022 перайшоў да Гарадскога цэнтра культуры.