У Гродне неўзабаве могуць з’явіцца новыя маршруты для актыўнага адпачынку. Іх разам з аднадумцамі распрацоўвае Дзмітрый Крапіўка, які 20 гадоў займаецца спартовым арыентаваннем.
Дзмітрый хоча паказаць гродзенцам, наколькі цікава можа быць спартыўнае арыентаванне: не толькі спартсменам, але і ўсім, хто любіць актыўны адпачынак.
«Падобныя праекты рэалізаваны ўжо даўно ў Скандынаўскіх краінах і набіраюць папулярнасць з кожным годам, — распавядае Дзмітрый. — Напрыклад, у Швецыі ў мінулым годзе ў падобным праекце прыняло ўдзел больш 40 000 чалавек і гэта толькі тыя, хто афіцыйна зарэгістраваўся ў сістэме. Па факце арганізатары гавораць пра 70 000 чалавек».
Праект называецца «МаяМапа». Ён прадугледжвае стварэнне ў Гродне спецыяльных маршрутаў у залежнасці ад узросту, фізічнай падрыхтоўкі і сродкаў перамяшчэння. Праходзіць маршруты дазволена неабмежаваную колькасць разоў. Маршруты можна планаваць самастойна.
На кожным з маршрутаў удзельнік будзе наведваць кантрольныя пункты (КП). Яны пазначаныя на мясцовасці драўлянымі слупкамі. На слупках будуць нумары і кампосцеры — кожны са сваёй перфарацыяй. А яшчэ на кожным пункце будзе шыльда з пазнавальнай інфармацыяй пра жывёл і птушак Беларусі.
Дзмітрый кажа, што яго праект уцягне ў актыўны лад жыцця людзей рознага ўзросту, інтарэсаў і фізічнай падрыхтоўкі.
«Можна проста шпацыраваць з дзецьмі і шукаць скарб. Дарослым можна выкарыстоўваць фармат ад звычайных прагулак пешшу ў пошуках кантрольных кропак, да прабежак ці пакатушак на ровары. Узімку можна нават на лыжах. Маршруты будуць як для пачаткоўцаў, так і для прасунутых».
Маршруты будуць даступныя бясплатна круглы год. У планах у Дзмітрый таксама зрабіць частку маршрутаў даступнымі і для людзей з інваліднасцю.
«У любы час сутак можна будзе дома раздрукаваць карту з маршрутам патрэбнай складанасці і пайсці ў лесапарк. Калі няма магчымасці раздрукаваць, то можна будзе выкарыстоўваць смартфон.
Для большага цікавасці ў нас будуць адмыслова зробленыя рэйтынгі ўдзельнікаў. Дадамо спартовы складнік і можна будзе прайсці маршрут на час і потым параўнаць яго з іншымі ўдзельнікамі і ўсё гэта будзе online», — распавядае Дзмітрый пра дэталі праекта.
У планах каманды маштабаваць праект «МаяМапа» на гарадскія лесапаркі і паркі Гродна, а ў будучыні выйсці на рэспубліканскі ўзровень — стварыць мінімум па адным маршруце ў кожным абласным цэнтры.
Карта для Гродна з маршрутамі ўжо амаль гатовая. Гэта адзін з самых складаных этапаў у стварэнні праекта.
У канцы красавіка стваральнікі праекта адправілі ліст ва Упраўленне архітэктуры, каб атрымаць дазволы на ўстаноўку стэндаў і слупкоў у Пышках, дзе карта цалкам гатовая. Наступнай павінна быць карта лесапарку каля 4-й бальніцы на Вішняўцы.
«Наперадзе яшчэ шмат працы і выдаткаў, таму мы шукаем спонсараў і аднадумцаў. Да рэальнага запуску праекта яшчэ 1,5−2 месяцы, магчыма і хутчэй — усё залежыць ад фінансавання».
Сайт праекта: sites.google.com/view/mymapa/
Падтрымаць праект можна на МолаМола: molamola.by/campaigns/1480
На “Гродна Азот” 2 траўня 2024 года адбылася атака кіберпартызанаў. З сістэмы выдалілі дадзеныя сотняў…
Гродзенец Ежы Грыгенча патрапіў пад спецвытворчасць. Працэс супраць мужчыны пачалі 2 траўня 2024 года. Ежы…
Польскія візавыя цэнтры ў Гродне і Лідзе паднялі цэну сэрвіснага збору. Зараз пры падачы на…
Найхутчэйшы рост цэн на харчовую прадукцыю ў Беларусі назіраецца ў Гродзенскай вобласці. За першы квартал…
Гродзенскіх школьнікаў прывялі ў ізалятар часовага ўтрымання. Гэта адбылося ў межах экскурсіі, паведаміла прэс-служба Упраўлення…
У цэнтры Гродна дабудоўваюць офіс IT-кампаніі “Афранс”. Ён будзе складацца з двух будынкаў на вуліцы…