Ілюстрацыйнае фота Hrodna.life
Турма № 1 Гродна аб’яўляе набор кандыдатаў на пасаду кантралёра дзяжурнай службы — калі прасцей, ахоўніка. Патрэбныя пяць кантралёраў, якім будуць плаціць 1300 рублёў у месяц, паведамляе Telegram-канал «Право имеют». Адпаведнае аб’ява-банэр з’явілася на сайце газеты «Вечерний Гродно».
Мяркуючы па банеру ў «Вечерним Гродно», кантралёрам абяцаюць:
На сайце цэнтра занятасці Гродна пералічылі патрабаванні да кантралёраў. Гэта: агульная сярэдняя адукацыя, узрост да 28 гадоў, не прыцягненне да адміністрацыйнай і крымінальнай адказнасці, 1 ступень прыдатнасці па стане здароўя да службы ў ВС РБ. Працаваць яны будуць па зменах. Кожны — на адну стаўку.
На сайце by.jooble.org сярод патрабаванняў таксама пазначылі: служба ва Узброеных сілах (не абавязкова) і «прыдатнасць да службы ў АУС па дзелавых і маральных якасцях, стане здароўя». Тут зарплата чамусьці меншая — 1100 рублёў. Але абяцаюць перспектыву будаўніцтва жылля за 3−4 гады на льготных умовах, льготнае пенсійнае забеспячэнне, шэраг даплат за ўмовы праходжання службы, выплату дапамог на аздараўленне і іншыя перспектывы.
Кандыдат пройдзе першапачатковую падрыхтоўку 2,5 месяца ў «Навучальным цэнтры МУС Рэспублікі Беларусь» у Мінску. У перыяд навучання курсанты забяспечваюцца бясплатным пражываннем, харчаваннем, форменным абмундзіраваннем і выплатай стыпендыі. На сайце riv.by пазначана, што аптымальны пол суіскальніка — мужчынскі.
Абавязкі ў вакансіі не пазначаныя. Верагодна, у іх уваходзіць «ажыццяўленне аховы і нагляду» за асуджанымі. Таксама кантралёраў шукаюць у СІЗА Брэста, Гомеля, Баранавічаў, Мінска, калонію-пасяленне ў Гомелі, папраўчую ўстанову адкрытага тыпу ў Брэсце.
Таксама турма № 1 Гродна аб’яўляе набор для паступлення ў Акадэмію Міністэрства ўнутраных спраў. Ім абяцаюць поўнае дзяржаўнае забеспячэнне, якое ўключае пражыванне, абмундзіраванне, харчаванне. Таксама іх чакае штомесячнае грашовае забеспячэнне ад 450 рублёў. Па заканчэнні навучання ім абяцаюць даць пасады сярэдняга і старэйшага начальніцкага складу з перспектывай службовага росту.
Паводле інфармацыі Hrodna.life, сілавікі пачалі прыходзіць у старэйшыя класы ў школы горада і вобласці. Яны клічуць паступаць у Акадэмію МУС менавіта на Крымінальна-выканаўчы факультэт. З турмы № 1 Гродна могуць даць мэтавае накіраванне для паступлення ў Акадэмію МУС. Прафарыентацыйныя сустрэчы прайшлі ў снежні 2021-лютым 2022 у школах Зэльвы, Смаргоні, Карэлічаў, Ашмянаў, Новага Двара (Свіслацкі раён) і іншых гарадах вобласці.
Выпраўленчая ўстанова «Турма № 1» упраўлення Дэпартамента выканання пакаранняў Міністэрства ўнутраных спраў па Гродзенскай вобласці лічыцца турмой, дзе ўтрымліваюцца самыя небяспечныя злачынцы, у тым ліку беларускія «злодзеі ў законе», пісаў пра турму «Беларускі партызан». Яшчэ ў савецкі час турму называлі «чырвонай зонай» — зонай, дзе парадак устанаўлівае адміністрацыя турмы і зэкі, «якія ўсталі на шлях выпраўлення». Былі яшчэ «чорныя» зоны — гэта зоны, у якіх за парадкам сочаць злодзеі ў законе.
Часам журналістаў пускалі ў турму, але сакрэтаў не выдалі. Дакладная колькасць ахоўнікаў - таямніца, пісала «Комсомольская правда».
Чытайце таксама:
На “Гродна Азот” 2 траўня 2024 года адбылася атака кіберпартызанаў. З сістэмы выдалілі дадзеныя сотняў…
Гродзенец Ежы Грыгенча патрапіў пад спецвытворчасць. Працэс супраць мужчыны пачалі 2 траўня 2024 года. Ежы…
Польскія візавыя цэнтры ў Гродне і Лідзе паднялі цэну сэрвіснага збору. Зараз пры падачы на…
Найхутчэйшы рост цэн на харчовую прадукцыю ў Беларусі назіраецца ў Гродзенскай вобласці. За першы квартал…
Гродзенскіх школьнікаў прывялі ў ізалятар часовага ўтрымання. Гэта адбылося ў межах экскурсіі, паведаміла прэс-служба Упраўлення…
У цэнтры Гродна дабудоўваюць офіс IT-кампаніі “Афранс”. Ён будзе складацца з двух будынкаў на вуліцы…