Інтэр'еры Старога замка плануюць упрыгожыць падсвечнікамі, бра і жырандолямі, стылізаванымі пад Рэнесанс. Іх вырабляюць тыя ж спецыялісты, што раней стваралі асвятленне для Мірскага і Нясвіжскага замкаў. Гэта лідскае прадпрыемтсва «Каскад» і бярозаўскі шклозавод «Нёман», піша «Лідская газета».
Стары замак у Гродне плануюць упрыгожыць двух- і трохметровымі напольнымі падсвечнікамі. На іх размесцяць мятровыя свечы ручной працы. Пакуль ёсць толькі эскізы і драўляныя загатоўкі. Метадам мастацкага ліцця і пацінавання зробяць бра.
«Працы для гродзенскага замка павінны адпавядаць стылістычным асаблівасцям позняга Рэнесансу. Наша задача, як вытворцаў прадметаў даўніны — дасягнуць максімальнай адпаведнасці той эпохі», — сказала мастачка Алена Ткачова, якая распрацоўвала эскізы.
ЗАТ «Каскад» — прадпрыемства ў сферы архітэктурна-мастацкага асвятлення і мастацкага ліцця. Вырабляюць светатэхніку на індывідуальныя замовы. Іх свяцільнікі ўпрыгожваюць многія аб’екты: помнікі архітэктуры, тэатры, музеі, банкі, гатэлі і санаторыі.
Жырандолі з «венецыянскага» шкла для залаў замка «Каскад» зрабіў сумесна са шклозаводам «Нёман». Для дзвюх жырандоляў спатрэбілася 1300 шкляных элементаў. Пры іх вытворчасці выкарыстоўвалі тэхналогію рыфлення. Дзякуючы гэтаму прамяні святла пераламляюцца і ствараецца эфект мільгання.
«Самае складанае — патрапіць у памер. Кожны шкляны элемент павінен супасці адзін з другім, міліметр да міліметра. З дапамогай аўтаматызаванай лініі зрабіць гэта было б не складана: задаў параметры — і машына штампуе. Але мастацкае шкло паддаецца толькі рукам чалавека. А ў гэтым выпадку спадзявацца можна толькі на вокамер майстра і яго віртуознасць», — сказаў намеснік галоўнага інжынера па шклопрадукцыі бярозаўскага шклозавода «Нёман» Сяргей Ігнатчык.
Маштабныя работы на тэрыторыі Старога замка распачалі восенню 2017 года. За аснову рэканструкцыі ўзялі праект мінскага архітэктара Уладзіміра Бачкова. Гэты праект выклікаў шмат спрэчак сярод гісторыкаў. У час першай чаргі рэканструкцыі рэстаўравалі браму і галерэю паміж ёй і палацам, а таксама з нуля пабудавалі вежу і камяніцу. Для наведвальнікаў гэтую частку Старога замка адкрылі ў лістападзе 2021 года.
Падчас другой чаргі плануюць рэстаўраваць палац. На завяршаючым этапе — сцены над Нёманам і ўнутраны двор. Паводле задумкі, замак павінен выглядаць так, як у часы Стэфана Баторыя.
Чытайце таксама:
Сезон працы гарадскіх фантанаў у Гродне адкрыюць 30 красавіка. З 20:00 у парку Жылібера запланавана…
Пра тое, за што Вольга Бондарава судзілася з гродзенскім сайтам Grodno.in, яна напісала сама. Прычынай…
Электразваршчык аднаго з прадпрыемстваў Дзятлаўскага раёна будаваў кароўнік без сродкаў абароны - фірма не ўкладвалася…
Гродзенцы патрабуюць ад чыноўнікаў растлумачыць, куды знік памятны знак, прысвечаны побыту ў Гродне нацыянальнага героя…
Таварыства з абмежаванай адказнасцю "Гроднаін", уладальнік партала Grodno.in, падало іск аб абароне дзелавой рэпутацыі да…
Каб атрымаць карту паляка, некаторыя грамадзяне Беларусі звяртаюцца ў суд. Там яны просяць памяняць нацыянальнасць…