У Зэльве прадаюць будынак млына XIX стагоддзя. За пабудову хочуць 30 тыс. рублёў ($ 10 тыс.). Млын можна перарабіць пад аграсядзібу альбо гасцініцу. У спіс гісторыка-культурных каштоўнасцей пабудова не ўнесена.
![У будынку млына XIX стагоддзя ў Зэльве можа з’явіцца гатэль ці аграсядзіба](http://cdn.optipic.io/site-102139/wp-content/uploads/2023/04/Mlyn-u-Zjelve-800x533.jpg)
Плошча будынка 720 кв.м. Да трохпавярховай пабудовы прылягае ўчастак у 50 сотак. Млын размяшчаецца на рацэ Зэльвянцы побач з Зэльвенскім вадасховішчам. Да будынка праведзена электрычнасць, ёсць асфальтаваная дарога. Побач з млыном можа быць выдзелены ўчастак для пабудовы жылога дома.
Гаспадару не хапіла моцаў зрабіць там гатэль
Сённяшні ўладальнік будынка — Іосіф — разам з братамі выкупіў былы млын каля 10 гадоў таму. Ён хацеў зрабіць там гатэль. Але пасля аварыі не знайшоў сіл займацца рэканструкцыяй.
«Гэта тыповы праект млына. Першапачаткова ён быў чатырохпавярхы, у гатычным стылі. Але калі праз Зэльву праходзілі нямецкія войскі, тут былі сур’ёзныя баі і будынак моцна пацярпеў. Пасля вайны яго перабудавалі, скараціўшы вышыню да трох паверхаў. У савецкі час млын выкарыстоўваўся як склад. А потым доўга стаяў без справы, пакуль яго не выкупіў адзін энтузіяст» — сказаў гаспадар будынка Іосіф.
![У будынку млына XIX стагоддзя ў Зэльве можа з’явіцца гатэль ці аграсядзіба](http://cdn.optipic.io/site-102139/wp-content/uploads/2023/04/Mlyn-u-Zjelve-1941.jpg)
Млын на Зэльвянцы пабудавалі ў канцы XIX стагоддзя. На млыне было кола з зуб’ямі дыяметрам тры метры. На версе будынка была выкладзена дата пабудовы.