З Варшавы ў Гродна пусцяць дадатковы аўтобус, а на некаторыя рэйсы напрыканцы снежня ўжо павышаны попыт. Агрэгатар паездак «Атлас» распавёў, як адкрытыя КПП і зімовыя святы паўплываюць на рэйсы.
Яшчэ адзін рэйс з Варшавы ў Гродна
Гродзенскі аўтобусны парк пусціць дадатковы рэйс па маршруце Варшава—Гродна. Аўтобус будзе курсіраваць у «пікавыя» дні 19, 21, 23 і 26 снежня. Кошт квітка — 130 руб.
Пераразмеркаванне аўтобусных патокаў паміж КПП
Пасля адкрыцця ў лістападзе 2025 года «Брузгоў» і «Бераставіцы» перавозчыкам прыйшлося пераарыентавацца. Справа ў тым, што перасякаць пагранпункты аўтобусы могуць толькі ў тым выпадку, калі ў іх ёсць дазвол.
Па тэме: Што беларусы думаюць аб пераразмеркаванні аўтобусаў паміж КПП?
Цяпер перавозчыкі, у якіх ёсць дазвол на праезд праз «Брузгі» ці «Бераставіцу», больш не змогуць праязджаць у пункце пропуску «Брэст». Гэта не закране перавозчыкаў, у якіх былі дазволы на праезд у гэтым пункце.
Білеты Беласток—Гродна практычна раскуплены
«Атлас» паведамляе, што на рэйсы Варшава—Гродна і Варшава—Мінск назіраецца падвышаны попыт. Білеты на 23−24 снежня з Беластока ў Гродна «практычна разабраны». Білеты з Вільні ў Беларусь пакуль у наяўнасці.
Агрэгатар паездак дадае, што напярэдадні свят «90% перавозчыкаў пакінулі кошт міжнародных паездак на ранейшым узроўні». Ёсць прапановы білетаў Мінск—Варшава, Мінск—Беласток і Гродна—Беласток за 100 руб.
Паводле інфармацыі «Атласа», праходжанне мяжы з Польшчай і Літвой займае «некалькі гадзін». Аднак спрагназаваць сітуацыю напярэдадні свят агрэгатар не можа.
Чытайце таксама: З Гродна па пакупкі ў Беласток: што прапануюць турфірмы пасля адкрыцця мяжы — ёсць і візавая падтрымка
