Яшчэ год таму гродзенскі пенсіянер Уладзімір Канстанцінавіч Райт ездзіў на ровары, але потым зразумеў, што яму патрэбен іншы, больш аўтаматызаваны транспарт. Пасля доўгіх пошукаў выбар гродзенца спыніўся на электрасамакаце. Пакупкай коштам у 850 долараў пенсіянер застаўся задаволены.
Сёння ў Гродне чалавек з уласным электрасамакатам гэта ўсё яшчэ цікавостка, нягледзячы на тое, што гэты транспарт цяпер стаў больш даступным у Беларусі. Свой электрасамакат Уладзімір Канстанцінавіч купіў у 2017 годзе.
«Доўгі час я катаўся на ровары і гэты транспарт мяне задавальняў. Асабліва у лес добра было на ім ездзіць. Але з узростам стала цяжэй», — кажа пенсіянер. Маўляў, у адзін бок яшчэ нічога, а вось назад больш складана. Менавіта праз гэта задумаўся пра змену спосаба перамяшчэння.
«Перш за ўсё транспарт мне патрэбен для прагулкі па горадзе. Я ў інтэрнэце шмат чытаў, раіўся з людзьмі. Было важна, каб з нагрузкай у апарата ўсё было добра, каб горку браў упэўнена. Выбар быў вялікі, прапаноўвалі гіраскутар, монакола, але я ў выніку спыніўся на электрасамакаце з сядлом».
Электрасамакат магутнасцю 500 Вт разганяецца да 25 км/г, мае пяць рэжымаў хуткасці. Поўнай зарадкі батарэі хапае на некалькі дзён.
«У Гродне сустрэць пенсіянераў на электрасамакатах — вялікая рэдкасць. Транспарт незвычайны. Магчыма, я ў горадзе з такім адзін. Трэба ўлічваць і цану апарата — 850 долараў. Не кожны зможа купіць. Асабіста мне не шкада было грошай на такую пакупку. Я вельмі рады, што набыў яго. Хоць было трохі боязна — не ведаў, што з гэтага ўсяго атрымаецца».
Адзіны недахоп перамяшчэння на электрасамакаце — якасць гарадскіх тратуараў. «Катаўся я і ў мінулым годзе і ў гэтым, агулам задаволены. Іншы раз з самакатам еду ў тралейбусе. Ён у мяне складны, важыць 16 кілаграм. Усё добра, акрамя некаторых дарог, якія ў нас не прыстасаваныя да двухколавага транспарту. Шмат дзе бардзюры і даводзіцца спыняцца. Дарога на БЛК наогул уся ў выбоінах».
Электрасамакат ва Уладзіміра Канстанцінавіча сезонны і ўзімку стаіць дома. А вось у цёплы час пенсіянер на электрасамакаце часта выклікае зацікаўленасць мінакоў.
«Многія спыняюць і пытаюць мяне пра электрасамакат. Я распавядаю. Магу сказаць, што маладым такі апарат не патрэбен, хай працуюць нагамі. Электрасамакат больш пасуе для людзей сталага ўзросту. Ён не толькі зручны, але ён і выдатна працуе. У гэтым апараце ўсё прадумана».
Сёлета на міжнародную акцыю Ноч музеяў у Лідзе рыхтуюць вогненны вечар, а ў сядзібе-музеі Агінскіх…
Калі ў вас добры запас яйцаклетак для апладнення, вы можаце дапамагчы зацяжарыць іншым дзяўчатам, якім…
Доступ да прышчэпкі ад віруса папіломы чалавека можа выратаваць многіх жанчын ад анкалогіі. У Беларусі…
Калі ў 2021 годзе некаторыя плакалі ад горычы паразы ці збіралі з аскепкаў разбітага “я”…
Гістарычны канал Hrodna 11:27 працягвае публікаваць кароткія фрагменты з жыцця Гродна ў 1924 годзе. Нататкі ўзятыя з мясцовай газеты…
Паслухаць класіку ці джаз у замкавым двары, патусавацца з байкерамі на беразе возера, адзначыць Купалле…