Гродзенскі і віленскі велаклубы працягваюць цеснае супрацоўніцтва. У адказ на майскую паездку «ВелаГродна» па Літве, у Гродна ў першы дзень лета прыехала група турыстаў з Вільні, каб бліжэй пазнаёміцца з беларускім горадам, яго славутасцямі і людзьмі.
Супрацоўніцтва клубаў доўжыцца ўжо больш за год. Адным з ініцыятараў такіх паездак па Літве і Беларусі з’яўляецца член «ВелаГродна» Андрэй Шавель.
«У гэтым годзе мы ў Гродне сустракаем другую групу турыстаў з Літвы, раней да нас прыязджалі госці з Польшчы і Расіі, — распавядае Андрэй Шавель. — Мы сустракаем турыстаў, дапамагаем з начлегам і паказваем горад. Тое ж самае робіцца і для нас у Літве. Гэта бюджэтны турызм, які даступны кожнаму. Такія паездкі даюць магчымасць паказаць горад менавіта з боку яго жыхароў. Цяпер цесна супрацоўнічаем з віленскім клубам „LKA“. Быццам і мяжа побач, але адно пра аднаго мы нічога не ведаем. Але ж некалькі стагоддзяў з літоўцамі мы былі ў адной дзяржаве, у нас адна гісторыя і шмат чаго агульнага».
Спецыяльна для гасцей «ВелаГродна» арганізаваў велаэкскурсію па горадзе. Для гэтага запрасілі прафесійнага экскурсавода Яўгена Махнача. У Гродна з Вільні прыехала 11 чалавек, некаторыя з іх упершыню ў беларускім горадзе. А для кагосьці гэта не першая паездка, як для Вікторыі Страздзеня.
«У Гродне я трэці раз і гэта адна з найлепшых паездак. Першы раз была на машыне і не паспела нават нармальна пазнаёміцца з горадам: паглядзелі тое, што прачыталі ў інтэрнэце. Другі раз ужо былі на роварах і Андрэй Шавель нас трохі пазнаёміў з горадам. А вось апошняя паездка апынулася найлепшай. Мы на роварах з экскурсаводам за некалькі гадзін аб’ехалі стары горад.
Шмат даведаліся цікавых фактаў. Адчуваецца, што гісторыя ў нас вельмі падобная.
Сам па сабе Гродна даволі зялёны і чысты, нагадвае Вільню. І радуе, што тут вельмі гасцінныя людзі. Вялікі плюс, што ёсць супрацоўніцтва велаклубаў. З мясцовым жыхаром на ровары адчуць краіну і горад можна значна лепш».
Вікторыя адзначае, што бязвізавы рэжым дазволіў многім турыстам адкрыць для сябе Беларусь з іншага боку.
«Раней цяжка было патрапіць у вашу краіну. Але цяпер, калі прыязджаеш, то разумееш, што сюды можна вяртацца. Гэта дзякуючы бязвізаваму рэжыму. Яшчэ некалькі гадоў таму я хацела прыехаць з дочкамі на некалькі дзён, але трэба было рабіць візу за 50 еўра. Для адной паездкі гэта было дорага. Цяпер усё стала значна лягчэй. Сеў на ровар і паехаў».
З Гродна літоўская група турыстаў адправілася на Аўгустоўскі канал. У чэрвені прадстаўнікі «ВелаГродна» адправяцца з віленскім клубам «LKA» ў паездку вакол Балтыйскага мора.
У Гродне можна купіць некалькі бізнес-цэнтраў, запоўненых арандатарамі. Сярод іх - былое чыгуначнае дэпо пачатку…
Як выглядала жыццё ў Гродне стагоддзе таму? Даведацца пра падзеі і клопаты штодзённасці можна са…
Як выглядала жыццё ў Гродне стагоддзе таму? Пра што пісалі тагачасныя журналісты і што чыталі…
Гродзенца Мікалая Лапкоўскага на вуліцах Стакгольма могуць назваць Дзімам - і ён адгукнецца. Менавіта пад…
Сусветны дзень касманаўтыкі адзначаюць 12 красавіка. У Гродне пра яго нагадваюць касмічныя тапонімы - турфірма…
У Telegram-канале беларускага Следчага камітэта "Спецпроизводство", акрамя публічных дзеячаў, пачалі з'яўляцца актывісты з рэгіёнаў і…