Фестываль вулічнага мастацтва прайшоў у Гродне (шмат фота)
Заявіць аб сабе змаглі музыкі, танцоры, тэатралы розных накірункаў і стыляў – усяго больш за дваццаць калектываў.
Арганізавалі фестываль гарадзенскі тэатр агню “Ergo Bibamus” супольна з аддзелам па справах моладзі Гродзенскага аблвыканкама.
Вядучым вечару быў знакаміты гарадзенскі фехтавальшчык з каманды аніматараў “Maskarada Matador” Васіль Калач (Эйрык, на здымку справа), апрануты напачатку ў вопратку манаха, а пасля – ці то пірата, ці то мушкецёра.
Нягледзячы на халоднае надвор’е, пад сцэнай у парку сабралася шмат падлеткаў. Артысты выходзілі на сцэну лёгка апранутыя, некаторыя рэпетавалі за сцэнай у адных майках. Тэмпературы паветра многія нібыта і не адчувалі – падтанцоўвалі, пляскалі артыстам, весяліліся. Былі і паважна-сумныя твары гледачоў, якія не змяняліся ад выступу да выступу.
Гурты выступалі вельмі рознаўзроўневыя: ад зусім самадзейных (ледзь не “гітары выразаныя з падваконняў”) да цалкам нават цікавых. Хіба такой і была ідэя фэсту.
У канцы фестываля гледачы ўбачылі фаер-шоў.
Здымкі Яна Лялевіча