Безпераможная серыя “Нёмана” працягваецца

Склад “Нёмана” прыкметна змяніўся, а галоўнае, што ў стартавым складзе гаспадароў назіралася 10 выхаванцаў гарадзенскага футбола. Яшчэ адной зменай стала тое, што Саладоўнікаў адважыўся замяніць незабiваючага Лясюка, на легіянера Лачнага. І не пралічыўся – Мілаш апраўдаў давер трэнера.

 

Падзеі ў сустрэчы развіваліся вельмі дынамічна. Ужо на першай хвіліне лік у сустрэчы адкрылі госці. Вызначыўся Казлоў, які пасля памылкі Садаўнічага, падхапіў мяч і адыграў у сценачку з Дзмітрыем Платонавым. Пасля вяртання мяча Аляксей лёгка даслаў мяч у далёкі кут варот Чэрніка.

 

Прайшло ўсяго 5 хвілін – і Лачны робіць лік роўным. У першым тайме славацкі нападнік меў яшчэ два добрыя шансы, каб вывесці сваю каманду наперад, але не атрымалася.

 

У самым пачатку другога тайму два выдатныя шанцы забіць меў капітан “Нёмана” Іван Дзянісевіч, але і ён згуляў няўдала. Здаецца, што ў апошні час ён не ведае, што рабіць з завяршэннем, правай прабіць не вырашаецца, пас аддае незразумела куды.

 

На 60 хвіліне Саладоўнікаў вырашыў замяніць актыўнага Лачнага. На поле выйшаў Лясюк, а пасля і Рэкіш, але абодва засталіся непрыкметнымі… Хоць удар Лясюка можна запісаць у небяспечныя: Андрэй паблізу штрафной адважыўся на ўдар з левай, але ён аказаўся не моцным. Часноўскі ледзь-ледзь кончыкамі пальцаў дастаў гэты мяч.

 

Выдатны шанс вырваць перамогу мелі госці, аднак Сяргей Чэрнік на 75-й хв. уратаваў сваю каманду.

Гарадзенская каманда не ведае перамогаў ужо ў шасці гульнях запар.

 

Сяргей Саладоўнікаў на пасляматчавай прэс-канферэнцыі:

 

“Наконт выхалашчанасцi каманды. Каб так сцвярджаць, трэба быць унутры калектыву. Я не згодны з гэтым меркаваннем.


А вось што турбуе – дык гэта нервовасць абароны. Шмат памылак, з-за якіх узнікаюць праблемы. У нас з калегам (Крывушэнка – рэд.) прыблізна аднолькавая сітуацыя – ёсць гульня, усе чакаюць выніку, але яго дамагчыся пакуль не атрымліваецца.


Усе зараз вельмі хочуць патрапіць у першую шасцёрку, з-за чага футбол як такі адыходзіць на другі план. Усім патрэбны вынік. Заклікаю балельшчыкаў падтрымаць каманду, не ўсё адразу будуецца. Усе хочуць, каб каманда зайграла адразу, як “Барселона”, а так не бывае.”

 

Турнірная табліца чэмпіянату выглядае зараз такім чынам:

 

Месца Каманда Гульні Ачкі
1. “Шахцёр”, Салігорск 10 23
2. БАТЭ, Барысаў 10 17
3. “Дынама-Мінск” 10 17
4. “Белшына”, Бабруйск 10 16
5. “Гомель” 10 16
6. “Мінск” 10 13
7. “НЁМАН” 10 13
8.  “Тарпеда-БелАЗ”, Жодзіна” 10 13
9. “Днепр”, Магілёў 10 11
10. “Нафтан”, Наваполацк 10 8
11. “Дынама-Брэст” 10 8
12. “Славія”, Мазыр 10 4

 

24 траўня. “Нёман” – “Тарпеда-БелАЗ” 1-1

 

Застаецца адзін матч з ФК “Дынама Мінск” (31 мая, 19.00), які завершыць першы круг чэмпіянату. Пасля гэтага супрацьстаяння мы падвядзем вынікі ўсяго круга. І пагутарым са спецыялістамі гарадзенскага футбола.