Вячаслаў Лісічкін: “Хакей па ТВ гляджу рэдка, падабаецца амерыканскі футбол”
Слава, чым займаешся ў адпачынку, ужо з’ездзіў куды-небудзь?
Цяпер адпачываю з сям’ёй у санаторыі, сумяшчаем прыемнае з карысным. Аднаўляюся пасля сезону.
Аддаеш перавагу хутчэй беларускім санаторыям, чым заморскім курортам?
Гледзячы, што мне трэба. Калі адпачыць, то, вядома, за мяжой, а калі паправіць здароўе, то бліжэй да хаты. Шчыра кажучы, гэта наогул мой першы досвед правядзення адпачынку ў санаторыі!
Слава на адпачынку з дачкой Сафіяй
Падабаецца? Ці чакаў лепшага?
Я адразу не будаваў ілюзій наконт сервісу, таму ўсе так, як і чакалася. Але я ехаў за працэдурамі, а яны мяне цалкам задавальняюць.
У мінулым годзе Слава абраў адпачынак на Мальдзівах…
Зборная і амерыканскі футбол
Давай успомнім мінулы сезон. Можа, цябе нешта трывожыць, тое што ты не здолеў зрабіць ці выканаць у мінулым сезоне? Ці ўсё прайшло як трэба?
Ну што можа трывожыць, калі мы выйгралі Кубак Прэзідэнта! Адзінае, што траўма не дала шанцу праявіць сябе ў зборнай, а так усё добра!
З кубкам, Слава пасярэдзiне
Як ацэньваеш гульню зборнай на Чэмпіянаце свету?
Згулялі на сваім узроўні. Калі б пашанцавала ў некаторых гульнях, месца было б крыху вышэйшае. Шчыра кажучы, хакей гляджу па тэлевізары вельмі рэдка.
А што глядзіш?
Амерыканскі футбол вельмі падабаецца!
Я чуў, што амерыканскі футбол гэта неад’емная частка трэніроўкі хакеістаў. Часта гуляеце?
Няма такога, першы раз чую! Можа, я проста не сутыкаўся з гэтым. Адкуль такія думкі?
Я проста заўсёды назіраю за маладымі хакеістамі, асабліва летам, калі трэніроўкі праходзяць на вуліцы. Дык яны гуляюць у рэгбі.
Слава з жонкай Iнай на ўзнагароджанні чэмпiёнаў
Са зборнай гэты год не атрымаўся. Ці плануеш трапіць у зборную на Чэмпіянат свету, які будзе праходзіць у Мінску?
Пажывём-пабачым, так далёка не зазіраю.
Аб зменах у беларускім хакеі
Якое тваё меркаванне пра ліміт на легіянераў і ліміт на ўзрост гульцоў?
Адмоўнае! Маладым ствараюць цяплічныя ўмовы! Я лічу, калі малады хлопец добры, ён і так патрапіць у аснову. І калі рабіць толькі двух легіянераў, то трэба прыбіраць узроставы ліміт.
Каго не спытаеш – усё супраць гэтых лімітаў. Дык для чаго або з-за чаго гэта робіцца?
А хто галасуе за іх? На выканкаме супраць галасуюць людзі, якія раней самі гулялі ў хакей. А вось хто галасуе за і чаму іх большасць? Гэта і ёсць пытанне!
Яшчэ аб адным з новаўвядзенняў. Якое тваё меркаванне пра самаакупнасць клубаў? Ці змогуць клубы самі сябе забяспечваць?
Думаю, гэта нерэальна.
Увогуле, як ты ацэньваешь дзеянні федэрацыі ў плане развіцця хакею ў Беларусі? А менавіта тое, што “Дынама” павінна быць базавым клубам для зборнай.
Трэба развіваць дзіцячы хакей і плаціць дзіцячым трэнерам годную зарплату. Але трэнеры павінны быць кваліфікаваныя, тады будуць вырастаць добрыя гульцы. З рашэннем па “Дынама” спазніліся, трэба было адразу так і рабіць. Рыжскае “Дынама” пайшло па гэтым шляху і прытрымліваецца яго да гэтага часу.
Пасля гульнявой кар’еры не плануеш стаць трэнерам?
Пакуль пра гэта не задумваюся. Хаця было б цікава паспрабаваць.
Небяспечны момант ля варот “Металурга”
Легенды гарадзенскага спорту
Пытанне, якое даўно хацеў задаць. Асабіста ў мяне хакейны “Нёман” асацыіруецца з табой, футбольны – з Дзмітрыем Кавалёнкам. Многія хлопцы хочуць на вас раўняцца, вы ўжо легенды гарадзенскага спорту. У чым сакрэт поспеху?
Дарэчы, Дзіму сёння акурат бачыў [усміхаецца]. Па пытанню нават не ведаю, што адказаць. Тут шмат фактараў.
Але што робіць чалавека вядомым?
Ды не такі я і вядомы! А галоўнае: працавітасць, дысцыпліна і псіхалогія.
Не трэба быць такім сціплым, у горадзе Лісічкін у нас адзін! Гэтаксама і з Кавалёнкам.
Вось мне крыўдна, як з Дзімам паступілі!
Даўно вы з ім знаёмыя?
Не вельмі, але маем добрыя адносіны. Ён заўсёды на хакей прыходзіць і сам не супраць паганяць шайбу. Ён фота новае выклаў, паглядзі! Гэта я яму сёння майку падарыў.
Дзмітрый Кавалёнак у новай майцы, падарунак ад Славы
Можа і ты таксама аматар цяжкай музыкі?
Я рускаму року аддаю перавагу, але і цяжкае таксама падабаецца.
Дзiма табе сваю майку таксама падарыў?
Я проста не калекцыяную майкі. А ў Дзімы яшчэ Касціцына ёсць, дарэчы.
Наш сайт чытаеш?
Я дрэнна разумею беларускую мову. Нарадзіўся ў Мурманску, прыехаў у Беларусь у 1998 годзе і першай камандай стаў “Нёман”. Гуляў адразу ў першай камандзе, але бывала, што і за дубль.
Ты ўжо больш за 15 гадоў у “Нёмане”. Ці была магчымасць куды-небудзь з’ехаць, змяніць клубную прапіску?
Калісці былі прапановы, але ўсё што робіцца – да лепшага. Даруй, у мяне сядае батарэйка ў тэлефоне!
Калі так, то скажы на развітанне, што зычыш заўзятарам “Нёмана”, якія з нецярпеннем чакаюць новага сезону?
Заставацца такімі ж адданымі, найлепшымі заўзятарамі!