Re1ikt вернецца ў бярлогу
Гурт Re1ikt прыедзе ў Гродна з канцэртам ужо не ўпершыню, апошні адбыўся ў “Beerлозе” два гады таму.
Гурт з’явіўся напачатку 2000-х, калі хлопцы былі яшчэ школьнікамі. Сёння Re1ikt гарманічна спалучае моцную энергетыку з арыгінальным гучаннем. Па сваёй стылістыцы ён блізкі да grunge, progressive rock, post rock, art rock, alternative rock. Сучасныя музычныя плыні гурт спалучае з традыцыйным беларускім песенным фальклорам. Амаль кожны іх выступ – гэта эксперымент з гучаннем.
Re1ikt удзельнічаў у фестывалях у Польшчы, Літве, Украіне, Беларусі. Нядаўна музыкі вярнуліся з “Басовішча”, дзе заявіліся адным з сямі беларускіх гуртоў. Будучы канцэрт у Гродне музыкі ладзяць таксама акурат падарозе ў Польшчу.
Чакаецца, што ў “Beerлозе” гурт прэзентуе новую праграму, якую рыхтуе да запісу свайго чацвёртага альбома.
Канцэрт адбудзецца ў межах кампаніі «Будзьма беларусамі!».
Наперадзе ў “Рэлікта” яшчэ летнія і восеньскія фэсты, такія як Metal Crowd 2013 у Рэчыцы, “Рок па вакацыях” у Мінску.