На 3 кастрычніка ў гарадзенскіх школах і бальніцах прызначана эвакуацыя
Паводле прэс-службы Гродзенскага абласнога упраўлення МНС, у аперацыі “Эвакуацыя” будуць удзельнічаць больш за 850 установаў і каля 200 тысяч чалавек.
Вучэнні распачнуцца па сігнале “Пажар”, – адначасова спраўдзяць і сістэмы апавяшчэння ў школах, бальніцах і інтэрнатах.
Вынікі вучэнняў гродзенскія выратавальнікі абмяркуюць з персаналам кожнай установы, зробяць высновы пра ступень падрыхтаванасці супрацоўнікаў, дакладнасць дзеянняў і рэальнасць самога плана эвакуацыі, дадуць парады.
Супрацоўнікі МНС спадзяюцца, што ў выпадку рэальнай пагрозы гэта дапаможа людзям своечасова адрэагаваць і пазбегнуць чалавечых ахвяр.
Аперацыя “Эвакуацыя” апошнія тры гады ладзіцца ў Гродне штогод.
Сёлета выратавальнікі падрыхтавалі сюрпрыз для выхаванцаў Гродзенскай спецыяльнай агульнаадукацыйнай школы-інтэрната для дзяцей з парушэннямі зроку.
Дзяцей не толькі навучаць карыстацца вогнетушыльнікамі, але прадэманструюць як працуе баявая тэхніка і абсталяванне МНС.
Паводле http://mchs.gov.by