“Нёман”: першы блін сабаку
У стартавыя хвіліны сустрэчы ў Гродне “Нёман” паспрабаваў паказаць, хто ў хаце гаспадар.
Футбалісты шмат атакавалі і ўжо на 7-й хвіліне Павал Савіцкі пасля выдатнага паса Лягчыліна мог альбо вывесці сам на сам з чужым брамнікам Зубовіча альбо прабіць сам. Павал абраў другі варыянт, але прабіў наздвычай слаба.
Затым гульня супакоілася і госці ўсё часцей пераходзілі на палову “Нёмана”. Праўда, без асаблівай вастрыні.
Хлопцы Сяргея Саладоўнікава таксама да канца тайма нічым, акрамя двух жоўтых картак (Савіцкі і Лягчылін) не вызначыліся.
А затым паўтарыўся характэрны для апошніх гульняў “Нёмана” сіндром пачатку другога тайма. Гэтым разам, праўда, у бок брамы гарадзенцаў быў прызначаны не пенальці, а небяспечны штрафны ўдар. Эмільсан біў амаль без разбегу і, узяўшы ў хаўруснікі штангу, адкрыў лік у сустрэчы. Ішла 55-я хв. сустрэчы.
Толькі пасля гэтага “Нёман” зноў паляцеў у атаку. Спачатку – без асаблівага поспеху. Але на 65-й хв. Дзянісевіч робіць пас у штрафную і гулец “Хабнаф’ёрдура” збівае Савіцкага. Хендрыкс атрымлівае чырвоную картку, а Савіцкі на 65-й хв. забівае пенальці!
Праз пару хвілін госці зноў маглі выйсці наперад, але Эмільсан выбегшы сам на сам з Рапалісам прайграў дуэль брамніку. Праз 10 хв. карцінка паўтарылася: зноў памыліліся гарадзенскія абаронцы і Эмільсан зноў выходзіў амаль сам на сам з нашым брамнікам, але маладому нападніку гасцей зноў не пашанцавала.
У гарадзенцаў пасля розыгрышаў кутніх маглі вызначыцца Савіцкі і Рыбак, але і ім не хапіла трапнасці.
У выніку нічыя 1-1, якая пакідае ісландцам крыху больш шансаў на перамогу па суме двух сустрэч: на сваім полі ім можна згуляць нават з лікам 0-0. А вось “Нёману” трэба будзе зноў гуляць “першым нумарам”, што ў нашай каманды сёлета не надта атрымліваецца.
Сустрэча ў адказ пройдзе ў Хабнарф’ёрдуры 24 ліпеня.
17 ліпеня. “Нёман” – “Хабнарф’ёрдур” 1-1