Гродна здалёк: Таццяна Оніл
Першая гераіня нашага праекту з’ехала з Гродна 11 год таму і жыве зараз у ЗША.
Таццяна Оніл:
Я жыву зараз з мужам і 5-гадовай дачушкай у штаце Вісконсін, у маленькім мястэчку пад назвай Барабу.
На другі дзень пасля прыезду ў ЗША лёс звёў мяне з будучым мужам. Вось так усё і закруцілася.
Першыя гады ў Штатах я працавала ў розных рэстаранах і гатэлях.
Самая першая мая праца была ў маленькім рэстаране хуткага абслугоўвання з вельмі смачным марозівам. Ужо там я зразумела, што калі не сачыць за сабой, то можна вельмі хутка паправіцца:)
Праз год пасля прыезду ў Амерыку я вельмі моцна захапілася ёгай.
Гэтая філасофія розуму, душы і цела настолькі прывабіла мяне, што я вырашыла звязаць з ёй сваё жыццё.
Прайшла тры розныя віды трэнінгаў па ёзе, атрымала сертыфікаты і сем гадоў таму адкрыла маленькую студыю па ёзе і пачала выкладаць у ёй.
З тых часоў ёга стала маім ладам жыцця і хоць і не вялікім, але заробкам на жыццё.
Першыя гады за мяжой вельмі моцна сумавала па Гродна. Я ўвесь час параўноўвала культуру дзвюх краін, людзей і грамадства. Было адчуванне, нібыта я разрываюся паміж дзвюма краінамі.
Мне не хапала шмат з таго, што Амерыка не можа мне даць, але адначасова я разумела, што Радзіма не можа мне даць усё тое, што я магу мець тут, у Штатах.
Мая душа заўсёды імкнулася і будзе імкнуцца вярнуцца ў Гродна, пабадзяцца па Савецкай, пасядзець на лавачцы ў парку Жылібера, схадзіць у драмтэатр на спектакль, наведаць Каложскую царкву і пахадзіць па музеях.
Таццяна з дачушкай у час апошняга прыезду ў Гродна ў 2014-м г.
Гэтага ў мяне ніхто не адбярэ. Але адначасова я разумею, што маё цяперашняе жыццё звязана з Амерыкай, з Барабу.
Я лічу сябе шчаслівым чалавекам, бо ўсведамляю, што зараз у мяне ёсць два дамы: Гродна (мой родны горад) і Барабу.
Гродна – гэта горад, дзе я нарадзілася, дзе прайшло мая школьнае жыццё.
Тут я набыла на ўсё жыццё самых верных сяброў. Самае галоўнае, Гродна – гэта месца, дзе жывуць мае самыя родныя і любімыя мне людзі.
Барабу – гэта мой другі родны горад, дзе зараз жыве мая сям’я, жывуць мае новыя сябры (амерыканцы і рускія) і месца, дзе я магу спакойна займацца любімай справай.
Шаноўныя сябры!
Героямі праекту “Гродна здалёк” можаце стаць вы самі (калі жылі ў Гродне, а зараз жывеце за мяжой), а таксама вашыя сябры, знаёмыя, сваякі, якія пераехалі жыць за мяжу.
Папрасіце іх напісаць пра тое, што яны ўзгадваюць найперш, калі думаюць пра Гродна, чым займаюцца зараз і мы з задавальненнем апублікуем гэта на нашым сайце.