Гарадзенцы пра бежанцаў з Блізкага Усходу: навошта нам мусульмане, і так працы мала
Кожны дзень навiны запоўненыя драматычнымі рэпартажамі пра бежанцаў, якіх усё больш ля межаў Еўрасаюзу. Кіраўнікі ЕС прымаюць рашэнні, каб кожная краіна прыняла да сябе пэўную колькасць мігрантаў. Беларусь не ўваходзіць у ЕС, але, кіруючыся прынцыпамі гуманізму, яна таксама магла б прыняць у сябе уцекачоў. Што пра гэта думаюць жыхары Гродна?
align=”middle” alt=”апытанне” width=”250″ height=”250″ >
Дзмітрый
– Ёсць вялікія асцярога, але ўсё ж гатовы прыняць. Як-ніяк у нас раўнапраўе, і няма розніцы якой веры аддае перавагу чалавек. Да ўсяго гэтага стаўлюся вельмі спакойна. Калі прыедуць, значыць будзем дапамагаць.
Ганна
– Вы жартуеце? Хай едуць да тых, хто і развязаў гэты канфлікт на Блізкім Усходзе. Цяпер Заходняя Еўропа і Амерыка хай разбіраюцца. Я лічу, што да нас не трэба ехаць. Лепш украінцаў браць, дарэчы якіх ужо хапае ў нас.
Таццяна
– Мы не гатовыя прыняць у сябе бежанцаў з Сірыі і шэрагу іншых краін. Гледзячы на ўсё, што зараз адбываецца ля межаў Еўрасаюзу, жудасна становіцца. Гэтыя людзі прыходзяць і ўсталёўваюць свае парадкі. Нам не трэба такога. Але, мы яшчэ не сутыкаліся з такім, але калі прыйдзе і стане каля парога, магчыма, дапаможам.
Рома
– Асабіста мая сям’я гатовая прыняць. Мы ўсе людзі і няважна якая вера і колер скуры. Чаму б не даць прытулак людзям, якія маюць патрэбу ў дапамозе?
Улада
– Увесь час Беларусь сябе прапагандуе як талерантную дзяржаву. Наколькі памятаю, у нас пражывае каля 25 розных канфесій. Калі ў нас разнастайны народ, чаму б яшчэ не ўзяць іншых нацыянальнасцей? У выніку мы атрымаем “этнічны прытон”, калі ўжо не атрымалі.
Аляксандр
– Украінцаў бралі і бярэм, бо свой народ. А вось навошта нам патрэбныя мусульмане? І так працы мала. Я лічу, што яны самі павінны вырашаць свае праблемы. Як уласна і мы. Калі наш прэзідэнт вырашыць дапамагчы бежанцам, тады будзем дапамагаць. А так, пакуль я супраць.
Сяргей
– У 1990 годзе я прыехаў у Гродна з Ташкента. Я як ніхто іншы ведаю, што сабой уяўляюць мусульмане. Паверце, яны тут не патрэбныя. Яны хітрыя. І жывуць яшчэ ў феадалізме. Для іх галаву адсекчы ў парадку рэчаў, а для нас гэта шок. Яны зусім іншыя людзі, у якіх свае законы і паняццi. Я лічу, што еўрапейцы павінны жыць з еўрапейцамі.
А вы гатовыя даць прытулак бежанцам? Выказвайцеся ў каментарах!
Першае фота: REUTERS, OGNEN TEOFILOVSKI