Філіял Парку высокіх тэхналогій адкрыюць у Гродне вясной 2016
Кампанія Instinctools – гродзенскі рэзідэнт Парку высокіх тэхналогій. 15 гадоў таму яе заснавалі чацвёра выпускнікоў мясцовага ўніверсітэта. Спачатку, прызнаецца дырэктар Віталь Шчыглінскі, справы ішлі цяжка. Са з’яўленнем Парку высокіх тэхналогій – а гэта адчувальныя падатковыя прэферэнцыі – з’явіліся заказы, ды і штат павялічыўся. Цяпер гэта 100 чалавек.
“Гэта дазваляе кампаніям развівацца значна хутчэй і дазваляе выходзіць на кліентаў сусветнага ўзроўню, таму што яны працуюць з табой напрамую. Ты дэкларуеш, што знаходзішся як прызнаная дзяржавай кампанія, і гэта дазваляе ім верыць у тваю экспертызу. А нам дазваляе выходзіць на такіх кліентаў як AUDI, Damler, Fujitsu”.
А вось студэнту 4-га курса Віталю Занеўскаму яшчэ трэба выбіраць будучае месца працы. Ён адзін з лепшых студэнтаў факультэта інфарматыкі і матэматыкі. Перспектыўнага айцішніка ўжо ўзялі пад увагу рэзідэнты Парку высокіх тэхналогій.
“Гэта вельмі цікавая спецыяльнасць, бо кожны раз пазнаеш новае, пастаянна развіваешся, набываеш новыя веды. Гэта перспектыўная спецыяльнасць як у нашай краіне, так і ва ўсім свеце”.
Магчыма, Віталю і не прыйдзецца з’язджаць з роднага горада пасля заканчэння ВНУ. Прадстаўніцтва рэзідэнтаў Парку высокіх тэхналогій у Гродне павялічыцца ўжо вясной. Тут адкрыецца першы рэгіянальны філіял. Мясцовыя ўлады перадалі Парку цэлы комплекс будынкаў у цэнтры горада, цяпер тут ідуць будаўнічыя работы.
Валерый Цапкала, дырэктар Адміністрацыі Парку высокіх тэхналогій: “Тут будзе знаходзіцца прадстаўніцтва Адміністрацыі Парку высокіх тэхналогій, будзе цэнтр, дзе маладыя людзі змогуць мець зносіны для таго, каб знаёміцца і ствараць новыя кампаніі. Тут мы будзем праводзіць трэнінгі, семінары на тэму, як ствараць свой інавацыйны бізнэс, як абараніць правы інтэлектуальнай уласнасці, асабліва калі прадукт арыентаваны за мяжу”.
Запатрабаванасць у IT-спецыялістах адчулі і ва ўніверсітэце імя Янкі Купалы. За пяць гадоў набор павялічыўся на 60%. Будучых спецыялістаў з першых курсаў курыруюць рэзідэнты Парку высокіх тэхналогій.
Генадзь Гачко, прарэктар Гродзенскага дзяржаўнага ўніверсітэта імя Янкі Купалы: “Гродзенскі ўніверсітэт вельмі даўно займаецца падрыхтоўкай спецыялістаў для IT-галіны. З Паркам высокіх тэхналогій супрацоўнічаем вельмі цесна. Мы прыцягваем спецыялістаў Парку для правядзення заняткаў з нашымі студэнтамі. У нас ёсць філіялы кафедраў на прадпрыемствах рэзідэнтах Парку высокіх тэхналогій”.
Узровень нашых праграмістаў ужо даўно ацанілі ва ўсім свеце. Да прыкладу, гарадзенскую кампанію амерыканскі сервер уключыў у топ лепшых беларускіх распрацоўшчыкаў. А гэта значыць, што айчынныя інтэлектуальныя распрацоўкі запатрабаваныя і прыносяць прыбытак.