Блізка 70-годдзе крывавай даты
Адзначаць гэтую дату збіраюцца пакуль толькі актывісты польскага руху.
Як паведаміў “Твайму стылю” прэс-сакратар Саюзу палякаў у Беларусі Ігар Банцар, 31 жніўня адчыніцца падрыхтаваная Консульствам Польшчы ў Гродне выстава, прысвечаная лёсу дзяцей у час вайны. На наступны дзень адбудзецца ўскладанне вянкоў да магілаў польскіх жаўнераў ды жалобная імша ў касцёле.
У сярэдзіне верасня ў памяшканні “Таварыства беларускай школы” можа адбыцца Круглы стол, прысвечаны падзеям Верасня 1939-га года ў Гродне.
Як паведаміў “Твайму стылю” ініцыятар гэтага мерапрыемства, прафесар Алесь Смалянчук, удзел у сустрэчы возьмуць гісторыкі, якія выкажуць свае меркаванні адносна трагічных падзеяў тых часоў.
Гэта асабліва актуальна на фоне таго “адката”, які назіраецца зараз у Расіі, дзе імкнуцца “адбяліць” імя Сталіна і віну СССР у развязванні вайны.
Нагадаем, што падпісаны 23 жніўня 1939-га г. міністрамі замежных справаў СССР (Молатаў) і Германіі (Рыбентроп) пакт прадугледжваў падзел сфераў уплыву ва Ўсходняй Еўропе паміж дзвума крывавымі таталітарнымі рэжымамі.
Да Германіі мела адыйсці Польшча, да СССР – Заходнія Беларусь і Заходняя Украіна (уваходзілі з 1921 г. у склад Польшчы), Літва, Латвія, Эстонія і Бесарабія (сённяшняя Малдова).
Карыстаючыся гэтай дамовай, Гітлер 1 верасня 1939 г. напаў на Польшчу. Праз два тыдні гэта ж зрабілі і Саветы. Сімвалам савецка-фашысцкага саюзу стаў сумесны парад савецкіх і нямецкіх войскаў у Брэсце.
Днямі больш за сто нямецкіх інтэлектуалаў падпісалі Адкрыты ліст, у якім за дату пачатку Другой Сусветнай вайны прызналі 23 жніўня 1939 г., калі быў падпісаны пакт Молатава-Рыбентропа.
Яшчэ раней Парламенцкая Асамблея АБСЕ прызнала, што савецкі камуністычны рэжым нясе такую самую адказнасць за злачынствы Другой Сусветнай вайны, як і фашысцкі рэжым тагачаснай Германіі. Гэтае рашэнне выклікала сапраўдную гістэрыю ў Расіі.
У спробах “перапісаць гісторыю” абвінавацілі АБСЕ і асобныя беларускія парламентарыі.
На здымку: могілкі жаўнераў Польскага войска ў Гродне
Фота Наталлі Чайкі, fotogrodno.net