![](https://dzh7f5h27xx9q.cloudfront.net/styl/images/cms-image-000060379.jpg)
Са старога ясеня ў парку зробяць арт-аб’ект, але пакуль невядома які
Пра скульптуру задумаліся яшчэ ў 2012
Дыягназ пра ўсыханне ясеня паставілі спецыялісты Гродзенскага аграрнага ўніверсітэта яшчэ ў 2008 годзе. Тады з-за аварыйнага стану дрэва яны не знайшлі магчымасці яго захаваць. У 2012 годзе вырашылі, што найлепшы варыянт захаваць пяцімятровы ствол – выразаць з яго скульптуру.
На ясені ў той час з’явілася адпаведная абвестка “Зелянбуда”, а ў пачатку 2013 года гарадскія ўлады абвясцілі конкурс эскізаў для рэалізацыі праекта. Вынікі конкурса мусілі быць сабраныя да 1 сакавіка і абвешчаны да 10-га.
Абвешчаны конкурс на выраб скульптуры з ссохлага дрэва ў парку Жылібера
Адной з найбольш рэалістычных на той момант выглядала прапанова гарадзенскага рэзчыка Мікалая Скляра. Майстар даводзіў, што нельга пакідаць дрэва “на карню”, бо вільгаць з глебы будзе парушаць яго цэласнась і прыводзіць да гніення.
Аднак у той год ні вынікаў конкурсу, ні скульптуры гарадзенцы не дачакаліся – ва ўпраўленні архітэктуры гарвыканкама паведамілі, што на яе выраб няма сродкаў, а архітэктурнае бюро “Гродназелянбуда” парэкамендавала закансерваваць парэшткі дрэва, каб захаваць іх да таго часу, калі з’явяцца грошы.
Другую хвалю выклікаў пост у блогу
Наступным разам хваля цікавасці да старога дрэва ўзнялася па “ініцыятыве з месцаў”. Краязнаўца Мечыслаў Супрон распавёў пра тое, як стварылі арт-аб’ект з засохлага дрэва ў Германіі, і прапанаваў зрабіць тое ж у нас.
Блогер прапануе зрабіць са старога ясеня ў парку Жылібера гістарычную скульптуру
Апублікаваны на “Тваім стылі” матэр’ял зацікавіў старшыню гарвыканкама. Мечыслаў Гой прапанаваў сайту правесці конкурс прапановаў на выраб паркавай скульптуры і паабяцаў падтрымку ў рэалізацыі.
Што зрабіць са старым ясенем? Стартуе галасаванне на лепшы праект паркавай скульптуры
Да канца верасня 2015 года “Твой стыль” атрымаў 13 прапановаў ад 6 аўтараў і правёў інтэрнэт-галасаванне. Большасць галасоў чытачы аддалі за праект Уладзіміра Качана.
У конкурсе ідэй для паркавай скульптуры са старога ясеня перамог праект Уладзіміра Качана
Аднак атрымаць фінансаванне на рэалізацыю гэтага праекта не атрымалася. Мастаку ў гарвыканкаме адказалі, што прадстаўлены праект адносіцца да “твораў манументальна-дэкаратыўнага мастацтва”, а іх рэалізацыя павінна адбывацца паводле адпаведнага заканадаўства. Вынікі галасавання ў інтэрнэце камісія назвала недастатковай падставай для фінансавання з бюджэту.
Штосьці зробяць, але яшчэ не ведаюць што
Тым не менш, гарадскія ўлады не адмаўляюцца ад ідэі стварыць арт-аб’ект са старога ясеня. Ва ўпраўленні архітэктуры паведамілі, што ясень уключаны ў тытульныя спісы аб’ектаў дабраўпарадкавання і работы даручаны гарадскому упраўленню ЖКГ і “Зелянбуду”. Замоўца аб’екта (ЖКГ) павінен будзе арганізаваць тэндар паміж праектнымі арганізацыямі і падрадчыкамі. Узгадніць мастацкі ўзровень канцэпцыі патрэбна з абласным экспертным мастацкім саветам.
Намеснік генеральнага дырэктара гарадскога ЖКГ Сяргей Семашка паведаміў, што зараз спецыялістам “Зелянбуда” трэба ацаніць стан дрэва і прынцыпова вызначыць, у якім выглядзе яно можа быць захавана. З яго словаў, верагодней за ўсё, пакінуць яго ў такім выглядзе як зараз не атрымаецца – стан драўніны ўжо не вельмі трывалы і не выключана пагроза абрушэння. Магчыма, дрэва будзе спілавана, карэнне закансервавана, а пасля ствол замацуюць на пні з дапамогай анкераў. З іншага боку, спецыялісты могуць палічыць больш мэтазгодным гарызантальнае размяшчэнне спілаванага ствала.
Зараз усе арганізацыйныя пытанні ў працэсе вырашэння. Пра вынікі кіраўніцтва гарадскога упраўлення ЖКГ абяцала расказаць ўжо праз тыдзень.
Гой возьме пад кантроль
Старшыня гарвыканкама Мечыслаў Гой пацвердзіў, што праект Уладзіміра Качан выканаць не атрымаецца – надта дарагі. Але магчыма, што да распрацоўкі больш простай ідэі мастака таксама прыцягнуць – усё ж яго праект спадабаўся гараджанам. Старшыня паабяцаў узяць працэс пад асабісты кантроль, каб арт-аб’ект сапраўды з’явіўся да фестывалю.
Чытай больш: