Спекталь, на якім спаць не будуць. У Драмтэатры рыхтуюць прэм’еру пра тое, “як прышыць старую”
У час прэс-канферэнцыі з нагоды прэм’еры
Рэжысёр Генадзь Мушперт
Спектакль па матывах гэтай п’есы ўжо ставіўся ў гродзенскім драмтэатры 22 гады таму. Рэжысёр-пастаноўшчык Генадзь Мушперт патлумачыў, чаму зноў звярнуўся да таго ж твора:
“П’еса Джона Патрыка «Дарагая Памэла, або Як прышыць старую» – гэта класіка. Па-першае, яна напісана вельмі таленавіта. Па-другое, у ёй уздымаюцца самыя-самыя сур’ёзныя пытанні – пытанні выбару чалавека паміж дабром і злом…
Гэта цудоўная камедыя пра тое, што кожны вымушаны выбіраць і кожны вельмі лёгка спакушаецца на зло. Акрамя аднаго персанажа – Памэлы. Вось таму пра яе і напісана п’еса. Гэта п’еса пра геніяльную жанчыну, перад якой пытанне выбару не стаіць”.
Святлана Літвінёнак і Таццяна Сакалоўская
Таццяна Сакалоўская, мастак-пастаноўшчык, лічыць, што вельмі складана бачыць свет, як Памэла, якая прымае ўсіх такімі, якія яны ёсць. Аднак светаўспрыманню гераіні тэатральны мастак знаходзіць тлумачэнне:
“Напэўна, трэба прайсці праз моцны боль у жыцці, у сабе, каб потым радавацца проста таму, што ўсе мы людзі і мы роўныя перад Богам”.
Галоўную ролю ў спектаклі, ролю Памэлы, выканае Святлана Літвінёнак. Актрыса гаворыць, што ёй вельмі падабаецца яе гераіня і яна нават хацела б мець такую сяброўку. Цікава, што Святлана Васільеўна грала ў спектаклі і ў мінулы раз. Праўда, іншую, маладую, ролю.
Актрыса адзначае адметную моўную фактуру п’есы. З аднаго боку, тэкст лёгка запамінаецца. Але з іншага, важна ўзнаўляць яго дакладна, не перастаўляючы словы, каб не згубіць музыкальнасць перакладу твора.
Макет сцэнаграфіі спектакля
Поруч з дасведчанымі акцёрамі-прафесіяналамі адну з роляў выканае пачатковец Аляксандр Матвейчык. Хлопец трапіў у тэатр выпадкова: не маючы працы, прыйшоў працаваць манціроўшчыкам, але хутка стаў памочнікам рэжысёра – яго запрасіла загадчыца трупы. Гэта ўжо другая роля Аляксандра.
Генадзь Мушперт успамінае, што ў мінулы раз, 22 гады таму, яму здавалася, што твор “Дарагая Памэла” можна аднесці да жанру драмы, мяккай, добрай, але ўсё ж драмы. Зараз жа ён зразумеў, што гэта камедыя, больш таго камедыя з плюсам, камедыя-фарс. Пра гэта сведчаць яркія і выразна акрэсленыя характары. Коратка змест п’есы ён характарызуе так: “Каханне, крадзеж і два ўваскрашэнні”. Галоўная гераіня ўваскрасае двойчы.
Рэжысёр прызнаецца, што не вельмі добра памятае, як ставілі п’есу ў мінулы раз. Усё ж прайшло шмат часу. Сёлетні спектакль – новае прачытанне таго ж твора. У параўннані з папярэднім спектакль стаў больш маладым і рухомым.
Па словах Генадзя Мушперта, спектакль паводле твора “Дарагая Памэла” не раз з поспехам ставіўся у тэатрах Беларусі і ўсяго свету. І не выпадкова. Рэжысёр перакананы, што гэта спектакль, на якім “людзі спаць не будуць. І менавіта таму гэта класіка”.