Гродзенскія палякі збіраюцца на акцыю пратэсту
Удзельнікі акцыі ў Гародні збяруцца ў 15 гадзін ля шыльды памяці рэпрэсаваных, што ўсталявана на сцяне Дома польскага.
Прэс-сакратар непрызнаванага ўладамі Саюза палякаў Ігар Банцар: “Ускладзем кветкі, запалім знічкі. Будуць сваякі рэпрэсаваных палякаў, дзеці, унукі.
Гэта добрая нагода, каб ушанаваць памяць ахвяраў і звярнуць увагу на сітуацыю, якая разгортваецца вакол Саюза палякаў сёння.
Праглядаюцца гістарычныя паралелі: 70 год таму рэпрэсіі супраць палякаў пачаліся па нацыянальнай прыкмеце, сёння нашыя правы таксама максімальна абмежаваныя. Калі нехта занадта актыўна заяўляе, што паляк і хоча нешта рабіць, адразу адчуваецца ўціск.
У нас фактычна адабралі маёмасць у Івянцы, у Баранавічах і Барысаве таксама вялікія праблемы.
Людзей папросту цкуюць. Асабліва гэта адчуваецца ў рэгіёнах”.
Сітуацыя вакол непрызнаванага Саюза палякаў на Беларусі асабліва абвастрылася пасля падзеяў вакол Дома польскага ў Івянцы.
Арганізацыю актыўна падтрымалі польскія палітыкі. У бліжэйшы час па гэтай справе прыме рашэнне Еўрапарламент.
З гэтай нагоды з прадстаўнікамі Еўрапарламента ў суботу сустрэнецца Анжаліка Борыс.
На фота: Анжаліка Борыс
Фота з сайта http://telegraf.by