Два варыянты для 32 зубоў

Разабрацца ва ўсіх гэтых пытаннях паспрабавала карэспандэнтка “Твайго Стылю” на ўласным прыкладзе.

 

Пачалося маё расследаванне з таго, што ў мяне амаль адначасова забалелі два зубы. Пажалілася сябрам і спытала, куды лепш пайсці лячыцца.

 

І вось пачаліся рознагалоссі. Большая палова амаль хорам агітавала за платныя ці прыватныя стаматалогіі.

 

Іншыя запэўнівалі, што там толькі дарма грошы на вецер выкіну.

 

“У дзяржаўных не горш лечаць” – пераканала мяне сяброўка.

 

Паглядзеўшы на некалькі візітовак “лепшых лекараў горада”, якія мне падсунулі занепакоеныя сябры, і знайшоўшы ў нататніку нумар маёй стаматалагічнай паліклінікі па месцы жыхарства, я прыняла рашэнне лячыць адзін зуб у платнай, а другі – у дзяржаўнай стаматалогіях.

 

Першы зуб спазнаў жорсткім катаванні ў дзяржаўнай стаматалогіі.

Па-першае, каб дастаць талончык, прыйшлося добра папацець.

 

– У Вас што, так невыносна баліць? – рыкнула мне ў трубку суровая супрацоўніца рэгістратуры.

 

– Так, – кажу, – вельмі невыносна.

 

– Тады прыходзьце з вострым болем! Што Вы мне галаву тлуміце?

 

У той жа дзень іду ў стаматалогію, займаю чаргу да свайго лекара. Сядзець прыйшлося хвілін 20-ць, выслухоўваючы страшныя апавяданні бабулек пра сталыя канфлікты з лекарамі.

 

Нарэшце заходжу ў кабінет, сядаю ў крэсла і распавядаю, што баліць.

 

– Абязбольваючае купіла? – без усякіх прадмоваў пытае мая дакторка.

 

Абязбольваючае, як і шпрыц, я не купіла. І мяне адпраўляюць у суседнюю аптэку за лекамі. Я купляю добрае абязбольваючае і шпрыц нейкай нямецкай фірмы. Аддаю за ўсё каля 7 тысяч рублёў.

 

Само лячэнне цягнецца прыблізна 40 хвілін з перапынкамі на тэлефонныя размовы, якія вяла дакторка, і яе балбатню з асістэнткай.

 

З горам напалову і болем, які адчуваўся нават праз абязбольваючае, мне ўстаўляюць пломбу і адпраўляюць рабіць здымак.

 

– Чатыры пяцьсот ёсць з сабой? – пытае мяне доктар. Ківаю, што ёсць, таму што распухлыя вусны не даюць прамовіць слова.

 

Адпраўляюся рабіць здымак, аплачваю працэдуру ў кабінеце з таблічкай “Каса”, на дзверы якога вывешаны пералік паслуг і іх кошт.

” Нічаго сабе,” – думаю, – “бясплатная медыцына!”.

 

У чарзе на здымак праштурхалася яшчэ 15 хвілін, потым хвілін пяць яго чакала, каб шчасліва вярнуцца ў кабінет стаматолага.

 

– Ну, здаецца, усё ў парадку. Прыйдзеш на агляд праз паўгады. Можаш збірацца.

 

Гэтае “здаецца”, вядома, гучыць падазрона, але я была вельмі радая хутчэй пайсці з гэтага непрыемнага месца.

 

З распухлымі вуснамі і гонарам, што вытрымала ўсе здзекі над сабой, я пакінула стаматалогію з надзеяй на тое, што вярнуцца сюды мне яшчэ доўга не прыйдзецца.

 

Наступны зуб мне рэанімавалі праз два дні ў платнай стаматалогіі.

 

Аддала я за ўсе “працы” над зубам 70 тысяч рублёў. Прыём прызначылі па тэлефоне на той жа дзень, раніцай якога я патэлефанавала ў стаматалогію.

Дзяўчына, якая адказала на званок, гутарыла са мной вельмі ветліва, высветліла, што ў мяне здарылася і паведаміла час, у які мне трэба прыйсці ў стаматалогію.

 

На шчасце, абязбольваючае, здымак і іншыя аперацыі ў кошт лячэння былі ўключаныя і праз 20 хвілін я пакінула стаматалогію.

Лекар апынуўся вельмі прыемным мужчынам, абязбольваючае – досыць моцным, каб не адчуваць болі, а пломба хутка застыгла.

 

Перажыты мной досвед падштурхнуў да наступных высноваў: калі вы жадаеце вылечыць зуб з малымі грашовымі выдаткамі, то варта ісці ў дзяржаўную стаматалогію, дзе вам, хутчэй за ўсё, ад шчырай душы паказычуць нервы.

Але пломбы, пастаўленыя тут, на другі дзень не вылятаюць, як часта прынята лічыць. Адзіны недахоп – яны на пару тонаў адрозніваюцца ад колеру зубоў, што робіць іх прыкметнымі.

 

У прыватных стаматалогіях лячэнне значна больш прыемнае і хуткае, але і сума аплаты павялічваецца ў шмат разоў.

 

Адно магу сказаць сапраўды: вылечаць вас і ў адным і ў другім выпадку. Праўда, гарантыі якасці будуць больш надзейнымі ў платных стаматалогіях.