Кляшчы выйшлі на веснавое паляванне
За медыцынскай дапамогай з сакавіка звярнуліся ўжо дзесяць гродзенцаў.
Кляшчоў яны падчапілі ў Пышках, Румлёве, у лесе каля вёсак Брузгі, Бяляны, Путрышкі, Багушоўка.
Пакуль на гродзенцаў нападаюць лугавыя кляшчы, заразіцца ад якіх цяжэй.
Аднак, як паведамілі “Твайму стылю” ў Гродзенскім занальным цэнтры гігіены і эпідэміялогіі, дамінуюць на Гродзеншчыне кляшчы лясныя. 99% пацярпелых становяцца менавіта іх ахвярамі.
Тэрмін актыўнасці кляшчоў падаўжаецца.
Асабліва камфортна кляшчы адчуваюць сябе пры цёплым і вільготным надвор’і.
Паводле эпідэміолагаў, у небяспецы жыхары Гродзенскай вобласці знаходзяцца 245 дзён у годзе.
Хаця ў Брэсцкай вобласці зафіксаваныя і выпадкі зімовай актыўнасці кляшчоў.
1 лютага 2009 года клешч укусіў вясковую жыхарку, 9 лютага – чатырохгадовага хлопчыка, які гуляў на лецішчы.
Спецыялісты тлумачаць гэтыя выпадкі надзвычай цёплым надвор’ем, што ўсталявалася на той момант.
Колькасць зваротаў пацярпелых ад кляшчоў гродзенцаў у медыцынскія ўстановы таксама павялічваецца, аднак, мяркуюць у Гродзенскім занальным цэнтры гігіены і эпідэміялогіі, гэты хутчэй з-за таго, што ўдасканалілася сістэма рэгістрацыі і ўліку, калі фіксуецца кожны зварот у паліклініку.
Кляшчы небяспечныя тым, што праз іх можна захварэць на хваробу Лайма альбо на клешчавы энцэфаліт.
Дарэчы, вірус энцэфаліта можна падчапіць таксама папіўшы малака ад інфікаванай каровы ці казы.
У пазамінулым годзе такі выпадак быў зафіксаваны ў Слоніме, дзе, пачаставаўшыся малачком на вёсцы ў бабулі, захварэла дзіця.
На шчасце, тады хваробу своечасова спынілі.