У Брузгах зніклі чэргі

|

Учора ў Брузгах быў складзены пратакол за ўжыванне лаянкі, але сур’ёзных інцыдэнтаў больш не ўзнікала.

Затое  практычна зніклі  чэргі на выезд: некалькі дзесяткаў легкавікоў учора ўвечары, толькі 20 сёння апоўдні і крыху больш – па абедзе.

 

Нават пры гэтым толькі за ўчарашні дзень каля 60 легкавых машын вярнулі назад у Беларусь.

Гэта транспартныя сродкі, кіроўцы якіх былі ў Польшчы меньш чым 5 дзён таму, не з’яўляюцца дыпламатамі, не едуць на лячэнне і не маюць працоўных віз.

Яшчэ больш машын не здолелі трапіць у Польшчу праз Брузгі за сённяшнюю ноч.

Раней выпадкі адмовы ў выездзе здараліся раз на некалькі месяцаў.

 

Намеснік начальніка Гродзенскай рэгіянальнай мытні Віктар Гурэеў патлумачыў “Твайму стылю”:

– Людзей на мяжы інфармуюць і тлумачаць, што пры выездзе часцей, чым 1 раз на 5 дзён неабходна аформіць паліва з дэкларацыяй і уплатай мытных плацяжоў.

У грамадзян, якія ездзяць радзей, праблем не ўзнікае.

Не ўзнікае праблем і ў тых, хто едзе па працоўных візах, на лячэнне, займаецца міжнароднымі перавозкамі…

Цікавае пытанне, хто яшчэ ездзіць за мяжу часцей, чым раз на пяць дзён?


Тым не меньш, пасля падпісання пастановы Саўміну № 753, якая рэгулюе вываз паліва з тэрыторыі Беларусі, на Гродзенскай рэгіянальнай мытні не сціхаюць тэлефонныя званкі ад усхваляваных і спалоханых грамадзян.

Усе складаныя пытанні супрацоўнікі Гродзенскай рэгіянальнай мытні аператыўна перанакіроўваюць у Мінск.

 

Віктар Гурэеў:

Шмат пытанняў знікне, калі проста ўважліва прачытаць тэкст Пастановы.

Хаця жыццё нашмат больш разнастайнае, чым любыя правілы, таму ўсе складаныя пытанні ў дадзены момант абагульняюцца, вырашаюцца ў Дзяржаўным мытным камітэце, і  ў найбліжэйшы час на сайце  http://gtk.gov.by з’явяцца афіцыйныя тлумачэнні і  раз’ясненні.


Фота з сайта http://telegraf.by