У гродзенскім інтэрнаце загарэўся ноўтбук
Абышлося без ахвяр, хаця з-за дыму супрацоўнікі МНС эвакуявалі 50 чалавек.
Галоўны спецыяліст Цэнтра прапаганды і навучання пры Гродзенскім абласным упраўленні МНС Вадзім Хатэнка:
– Выпадак даволі рэдкі.
Па папярэдняй версіі, сам кампутар быў выключаны, але ў сетку застаўся ўключаны адаптар. Ён ляжаў на ложку, ды яшчэ і накрыты коўдрай.
Хутчэй за ўсё адаптар вельмі моцна нагрэўся.
Калі б ён знаходзіўся на стале ці на падлозе, пажару б не здарылася.
Але зыходзячы з дому, электрапрыборы неабходна выключаць з сеткі.
Сёлета ў Гродне гэта трэці пажар у інтэрнаце.
З пачатку года ў Гродзенскай вобласці здарылася 852 пажары, на якіх знойдзены 96 загінулых.
З-за парушэнняў правіл пажарнай бяспекі пры эксплуатацыі электрапрыбораў загінулі 3 чалавекі.
135 пажараў здарыліся з-за непаладак з электрычнасцю: кароткіх замыканняў, няспраўных побытавых прыбораў, перагрузак у сетцы, пашкоджанняў праводкі і г.д.
Найбольшая колькасць загінулых на пажарах – 58 чалавек – ахвяры неасцярожнага палення.
Фота з сайта http://112.by