![](https://dzh7f5h27xx9q.cloudfront.net/styl/images/cms-image-000021051.jpg)
Дзяўчынка з дапамогай каменчыка і цвіка “размалявала” 14 машын
Пацярпелыя пачалі звяртацца ў міліцыю ў пачатку красавіка.
На капоце, дзвярах аўто былі выдрапаныя незразумелыя сімвалы і малюнкі, а ў некаторых выпадках непрыстойныя надпісы.
Прааналізаваўшы малюнкі і надпісы, супрацоўнікі Ленінскага раённага аддзела міліцыі Гродна прыйшлі да высновы, што шкодзіць дзіця ці падлетак.
Абыходзячы двары, аператыўнікі звярнулі ўвагу на дзяўчынку з каменчыкам у раках.
Дзіця вымалёўвала на асфальце незразумелыя фігуркі.
Параўнаўшы малюнкі з выявамі на пашкоджаных машынах, супрацоўнікі міліцыі пачалі назіраць за дзяўчынкай.
Праходзячы побач з машынай, яна пакінула на кузаве выразную драпіну. Тут “мастачку” і затрымалі.
У прысутнасці бацькоў дзяўчынка распавяла, што вельмі любіць маляваць. Яна паспела “абмаляваць” каменчыкамі і цвікамі 14 аўто.
Заплаціць немалую суму за задавальненне дачкі давядзецца бацькам.
А супрацоўнікі міліцыі раяць аўтаўладальнікам паркаваць машыны не ў дварах, а на платных аўтастаянках.
Паводле http://uvd.grodno.by
Здымак з сайта http://pda.privet.ru