Гульня «Нёман» – «Дынама»: незалічаны гол, абураныя фанаты і задаволены трэнер

У сонечны і гарачы дзень футбол пачынаўся ў цэнтры горада, адкуль мясцовыя фанаты ФК «Нёман» арганізавалі марш па вуліцах горада да стадыёна.

 

Здавалася б, надвор’е добрае, свята – футбол, усё законна, але міліцыя згуляла сваю ролю: яшчэ да матчу, падчас маршу, адбылося некалькі інцыдэнтаў з супрацоўнікамі. Праўда, затрыманняў не было.

 

На стадыёне фанаты сутыкнуліся яшчэ з адной проблемай: кожны фанат 21-га сектара павінен быў даць свае дадзеныя інспектару, якi іх фіксаваў, а потым яшчэ прыходзiлася міла размаўляць з чалавекам у цывільным… на камеру.

 

На адказ «Я не хачу», цывільны грамадзянін прапаноўваў пакінуць стадыён.

 

Пустая фанацкая трыбуна

 

На першай хвіліне гульні фанаты «Нёмана» дэманстратыўна сабралі сцягі, банеры і пакінулі свой сектар у знак пратэсту супраць дзеянняў міліцыі, якая забараніла развешваць сцягі і фатаграфаваць перфоманс.

 

У след фанатам прагучала ад супрацоўнікаў міліцыі ветлівае: «Гэта вам не дапаможа».

 

Гульня пачалася без мясцовай падтрымкі. У той жа час на сектары «Дынама» адбываўcя аншлаг, бо гасцей з Мінска прыехала каля 300…

 

У стартавым складзе «Нёмана» выйшаў Дзмітрый Кавалёнак – лепшы бамбардзір каманды.

 

У гульні брамнік “Нёмана” Сяргей Чэрнік

 

З пачатку матча «Нёман» пайшоў у атаку, камандзе хоць як трэба было рэабілітавацца за паразу ад «Мінска» у паўфінале Кубка Беларусі.

 

«Нёман» выглядаў добра: шматлікія камбінацыі, напады прыводзілі пагрозу да брамы Сулімы.

 

У адным з момантаў Кавалёнак забіў свайму былому аднаклубніку, але мяч залічаны не быў, суддзя зафіксаваў становішча па-за гульнёй.

 

Атакуе Павал Савіцкі

 

Першы тайм гродзенцы гулялі лепш гасцей. У другім тайме «Нёман» яшчэ больш стаў пагражаць варотам «Дынама»: у адзін з момантаў Кавалёнак трапіў у перакладзіну, пасля чаго пашкодзіў нагу і быў вымушаны замяніцца.

 

Пасля яго гульня «Нёмана» стала сумнай. Да канца матчу. Зноў няма галоў, няма перамог.

 

Пасля 7 тураў «Нёман» займае 8 месца з 6-ю ачкамі ў актыве.

 

 Галоўны трэнер «Нёмана» Сяргей Саладоўнікаў пракаментаваў нічыю з «Дынама»:

 

– Мы былі вінаватыя перад нашымі заўзятарамі. Амаль усё ў футболе залежыць ад псіхалогіі, таму, магчыма, гульцы не вытрымалі ціску.

 

Мы правялі сёння моцны матч. Я не памятаю каманды, якая стварала б столькі момантаў у гульні з «Дынама».

 

Спадзяюся, што гэты станоўчы зарад мы пранясём да наступных паядынкаў.

 

Фота: Lambretta, афіцыйны сайт ФК “Нёман”