“Дзень нараджэння ў заапарку” – гродзенскі звярынец прапануе новую паслугу
Загадчыца навукова-асветніцкім сектарам заапарка Алена Пятрова распавяла “Твайму стылю”:
– Гэтую ідэю мы выношвалі даўно, чакалі заканчэння рэканструкцыі, каб тэрыторыя дазваляла запрашаць гасцей.
Экскурсіі з элементамі забаўляльнай праграмы паспрабавалі праводзіць на навагоднія святы, і ўбачылі, што попыт ёсць.
“Дзень нараджэння ў заапарку” – гэта нестандартная экскурсія з мноствам гульняў, загадак.
Пасля экскурсіі – рухомыя гульні, віктарыны.
У тэрарыўме дзецям выносяць жывую змяю, да якой можна дакрануцца, сфатаграфавацца з ёй. Звычайна, гэта полаз.
Дзеці завітваюць у жывы куток гуртка юнатаў, дзе сабраная калекцыя ручных жывёл.
Уся праграма займае прыкладна гадзіну.
Гэта аптымальны час, калі 6-10 гадовыя дзеці не паспяваюць стаміцца.
Кошт “Дня нараджэння ў заапарку” – 60 000 рублёў на групу да 10 чалавек без уліку кошту ўваходных квіткоў.
Паклапаціцца пра арганізацыю дзіцячага свята лепш загадзя: праца адзінага экскурсавода ў заапарку распісаная як мінімум на тыдзень наперад.
У дзіцячай кавярні на тэрыторыі заапарка можна замовіць пачастунак для імянінніка і яго гасцей.
Атрымаць падрабязную інфармацыю і замовіць “Дзень нараджэння ў заапарку” можна ў працоўныя дні па тэлефоне 95 13 74.
Здымак з сайта http://www.grodnozoo.by