![](https://dzh7f5h27xx9q.cloudfront.net/styl/images/cms-image-000022788.jpg)
Запрашаюць валанцёрскія летнікі Гродзенскай вобласці
МГА “ Гісторыка” запрашае з 16 да 29 ліпеня на летнік ва Ўсялюбе, што ў Наваградскім раёне. Тут да нашага часу захаваўся адзін з найбольш старажытных касцёлаў на тэрыторыі сучаснай Беларусі – Касцёл Сьвятога Яна Хрысціцеля, збудаваны напачатку 15 стагоддзя, як мяркуецца, Янам Нямірам, канюшым Вітаўта Вялікага. Намаганні валанцёраў будуць накіраваныя на інвентарызацыю старых могілак і аднаўленню капліцы-пахавальні Оруркаў,якая была збудавана ў 1837 годзе.
Больш падрабязную інфармацыю можна атрымаць па тэлефоне +375295043114 (Таша) ці на сайце http://my-historica.org
Гэтае ж аб’яднанне запрашае ў Крэва для распрацоўкі ды адпрацоўкі на практыцы турыстычных роварных маршрутаў. Пройдзе гэты летнік з 20 да 26 жніўня.
Сумесна з ГА “Беларускі камітэт ICOMOS” з 30 ліпеня да 12 жніўня ў мястэчку Гальшаны МГА “Гісторыка” ладзіць яшчэ адзін летнік па добраўладкаванні тэрыторыі замка ды прыборцы старадаўніх могілак.
Увесь летні перыяд (акрамя тэрміну 3-24 ліпеня) валанцёраў чакае Любча. Арганізатарам летніка “Любча над Нёманам 2012” выступае МГА “Беларуская асацыяцыя студэнтаў-архітэктараў”.
Працы тут хопіць усім. Трэба будаваць купалы, класці сцены, рыхтаваць цэглу, даглядаць парк… Увогуле, аднаўленне Любчанскага замку – унікальная з’ява для Беларусі, бо рэстаўрацыя помніка архітэктуры XVI стагоддзя вядзецца рукамі валанцёраў і энтузіястаў пад кіраўніцтвам Івана Пячынскага, які стварыў Фонд “Любчанскі замак”, і за ахвяраванні неабыякавых. За некалькі мінулых гадоў дзякуючы адданай працы валанцёраў была адроджана з руінаў Кутняя вежа, расчышчаны завалы смецця на тэрыторыі замчышча, ідзе рэканструкцыі помніка.
Таму, калі ў вас ёсць жаданне паўдзельнічаць у сапраўды гістарычнай справе, – Любча чакае вас. Тым больш умовы пражыванне прыстойныя – ёсць памяшканне, ложкі, коўдры ды кухня. Лепш, канешне, загадзя патэлефанаваць: +375298969785 (Валянціна), +375297461185 (Наста), +375295571124 (Цімох), ці зайсці за дадатковай інфармацыяй на сайт: http://icomos.by
З 1 па 18 жніўня Дабрачынны фонд “Крэўскі замак” запрашае ў летнік, падчас якога пройдуць археалагічныя раскопкі, збор вуснай інфармацыі ды прыборка тэрыторыі старых могілак. Таксама для людзей творчых будзе праведзены фота- ды мастацкія плэнеры. Акрамя гэтага будзе праца па добраўладкаванню тэрыторыі замка ды даследванне старажытнай забудовы мястэчка. Пражыванне ў памяшканні ды наметах. Для ўдзелу ў летніку неабходна запоўніць анкету і адправіць на адрас [email protected] . Анкеты валанцёраў даступныя на сайце www.kreuskizamak.by
Гальшаны з 1 па 14 жніўня запрашаюць на археалагічныя раскопкі на гальшанскім гарадзішчы. Каб паўдзельнічаць, трэба патэлефанаваць арганізатарам – археолагам з Акадэміі навук.
Кантакты: +375 29 7651704 (Павел), +375 29 878 1918 (Яўген)