Сенат ЕГУ асудзіў звальненне Андрэя Чарнякевіча
Па версіі ГрДУ ім. Янкі Купалы, яго звальненне было выкліканае «сістэматычным парушэннем працоўнай дысцыпліны».
Сенат ЕГУ лічыць гэтае рашэнне парушэннем акадэмічных свабод, якое не павінна мець месца ў сучаснай Еўропе, і выказвае сваю падтрымку гісторыку, чые працы атрымалі міжнароднае прызнанне.
Чарнякевіч з’яўляецца адным з аўтараў нядаўна выдадзенай кнігі «Гродназнаўства», якая завяршаецца этапам дасягнення Беларуссю незалежнасці і не ахоплівае перыяду станаўлення аўтарытарнага рэжыму прэзідэнта Аляксандра Лукашэнкі.
Беларускія навукоўцы і студэнты, якія выказваюць крытычнае стаўленне да існуючай улады, часцяком робяцца ахвярамі санкцыяў і дыскрымінацыі. Студэнтаў рэгулярна выключаюць з універсітэтаў за выказванне ўласнай пазіцыі (па звестках арганізацыі «EU Observer», пачынаючы ад 2006 года, мела месца каля 700 падобных выпадкаў).
Група гродзенскіх гісторыкаў падрыхтавала адкрыты ліст у падтрымку звольненага суаўтара “Гродназнаўства” Андрэя Чарнякевіча. Зварот скіраваны да міністра адукацыі ды кіраўніцтва Гродзенскага дзяржаўнага універсітэту імя Янкі Купалы.