![](https://dzh7f5h27xx9q.cloudfront.net/styl/images/cms-image-000026786.png)
Гродзенскія веласіпедысты атрымалі адпіску ад гарвыканкама
Адказу чакалі амаль месяц: ліст быў перанакіраваны ва ўпраўленне архітэктуры і горадабудаўніцтва. А калі дачакаліся – не зразумелі яго сэнсу.
У лісце за подпісам намесніка начальніка упраўлення гаворыцца, што ўсталяванне велапарковак вядзецца “паводле распрацаваных схем веласіпеднага руху” і абяцаецца выкарыстаць прапановы аўтараў ліста ў часе распрацоўкі перспектыўнай схемы веласіпеднага руху ў Гродне.
Хто і калі збіраецца распрацоўваць схему веласіпеднага руху ў Гродне не ўдакладняецца.
А ў пункце дакумента, на які спасылаецца упраўленне, гаворыцца толькі, што “веладарожкі і месцы для часовага захоўвання веласіпедаў трэба праектаваць адпаведна патрабаванням СНБ 3.03.02”.
Юля Каляда, адна з аўтараў ліста ў гарвыканкам:
– Мы месяц чакалі адказу, а тое, што нам адказалі нас скрайне не задавальняе. Няма адказу ні на воднае з пастаўленых намі пытанняў, спасылаюцца на пункт, які нічога не тлумачыць у дадзенай сітуацыі. Нас вельмі здзіўляе, як упраўленне архітэктуры і горадабудаўніцтва можа так вольна трактаваць дакументы.
Пасля навагодніх святаў адправім у гарвыканкам новы ліст, бо хочам усё ж атрымаць адказы на нашыя пытанні.
Нам адказалі, што нашы рэкамендацыі ўлічаць ў часе распрацоўкі перспектыўнай схемы веласіпеднага руху ў Гродне. Але мы ўпершыню чуем пра гэтую схему і хочам высветліць, ці сапраўды ёсць нейкі перспектыўны план развіцця велаінфраструктуры ў горадзе, ці гэта толькі адпіска.
На думку гарадзенцаў, у горадзе не хапае каля 100 велапарковак.
Гродзенскія велаактывісты накіравалі 80 лістоў у арганізацыі і ўстановы горада з просьбай усталяваць велапаркоўкі. Адказы атрымалі толькі ад шасці: 2 – адмоўных, 4 – з абяцаннямі разглядзець прапановы.
Каля ўваходу ў гарвыканкам велапаркоўкі таксама няма.
Здымак http://velogrodno.by