Святы Мікалай наведаўся ў Гродзенскі цэнтр медыцынскай рэабілітацыі
Свята зладзілі валанцёры хрысціянскага валанцёрскага Руху святога Мікалая.
Прадстаўнікі розных хрысціянскіх канфесій аб’ядналіся на базе Гродзенскай грэка-каталіцкай парафіі Маці Божае Фацімскай і ўжо тры гады апякуюцца дзецьмі з псіха-фізічнымі асаблівасцямі.
Валанцёры наведваюць дзяцей па выходных, а ў калядны перыяд рыхтуюць падарункі і робяць святочную імпрэзу.
Разынкай сёлетняга свята сталі традыцыйныя калядныя персанажы.
Дзеці з радасцю ўдзельнічалі ў святочных забавах
У конкурсе на самую вялікую мыльную бурбалку перамагчы хацеў кожны
Але найбольш усе чакалі святога Мікалая.
Усе расказвалі святому Мікалаю навагоднія вершыкі, а Ліза заспявала “Купалінку”
І дзеці, і валанцёры ёй падпявалі
За гады сяброўства з валанцёрамі дзеці прызвычаіліся, што падарункі на Раство ім прыносіць не Дзед Мароз, а святы Мікалай, якому яны кажуць не “спасибо”, а “дзякуй!”
Валя вельмі хацела атрымаць заплечнік і зайца, нават напісала пра гэта ў лісце.
Ліст атрымалі валанцёры, а дзяўчынка – доўгачаканы падарунак.
Пра тое, што Дыяна марыць пра ляльку, а Таня – пра запісную кніжку з замочкам, валанцёры даведаліся з публікацыі ў “Вячэрнім Гродне”.
І выканалі жаданне дзяўчынак.
Таня не бачыць ад нараджэння, але кажа, што марыла менавіта пра такі блакноцік
Дыяна папрасіла сфатаграфаваць яе з падарункамі, каб падарыць здымак дырэктару школы для дзяцей-інвалідаў па зроку, у якой яна вучыцца.
