Пажартавалі: пакет на галаву і ў багажнік
Падзяку і падарунак атрымала гарадзенка, якая паведаміла ў міліцыю пра знойдзеную ў двары паляўнічую стрэльбу. Пашанцавала, што яе не паспелі знайсці дзеці альбо яна не трапіла ў “дрэнныя“ рукі.
Яшчэ адзін неабыякавы грамадзянін атрымаў падзяку за дапамогу ў раскрыцці злачынства, якога не было.
30 снежня 2012 года Сяргей Гурыновіч (на здымку) разам з сям’ёй ездзіў за перадсвяточнымі пакупкамі.
На вуліцы Кірава з вакна машыны заўважыў, як двое хлапцоў вывелі з пад’езду дома чалавека з пакетам на галаве і пагрузілі яго ў багажнік пазадарожніка.
Гарадзенец неадкладна патэлефанаваў у міліцыю.
У горадзе абвясцілі план “перахоп” і хутка падазраваных затрымалі.
Высветлілася, што злачынства не было. Сябры “пажартавалі” і вырашылі паглядзець, як адрэагуюць грамадзяне і міліцыя.
За няўдалы жарт вінаватыя аштрафаваныя, а пільны сведка атрымаў падарунак.
Па выніках 2012 года колькасць зарэгістраваных злачынстваў на тэрыторыі Ленінскага раёна Гродна ў параўнанні з 2011 годам зменьшылася на 26,7%.
Летась у раёне зарэгістравана 1300 злачынстваў.
З іх 584 – крадзяжы маёмасці: 203 у жылых будынках, 60 – з аб’ектаў гандлю, 135 крадзяжоў з аўтамашын.
У 308 выпадках падазраваныя ў крадзяжах не знойдзеныя.
Па выніках года раскрыта 47,3% крадзяжоў (на 14,7% больш, чым у 2011 годзе).
У раёне адбыліся 3 забойствы, 19 фактаў цяжкіх цялесных пашкоджанняў.
Расце падлеткавая злачыннасць: у 59 злачынствах удзельнічалі 42 непаўнагадовых жыхара раёна.
Паводле http://glenad-grodno.gov.by