За рулём толькі жанчыны

| Без катэгорыі

Сесці за стырно маглі любыя кіроўцы-жанчыны, незалежна ад вопыта і стажа кіравання. Мужчыны гэтым разам выступалі толькі ў якасці штурманаў.

 

Арганізатары, клуб “Поўны прывад”, усяляк падкрэслівалі, што “Супер 8” – гэта не складаныя і жорсткія спаборніцтвы, а больш мерапрыемства для папулярызацыі пазадарожнага кіравання аўтамабілямі. Так склалася, што жанчын у гэтым экстрымальным відзе аўтамабільнай язды не вельмі шмат. А гэта несправядліва!

 

Гоншчыцы выязджаюць на старт

 

Таму і арганізуюцца такія заезды: каб паказаць, што жанчыны не горш кіруюць такімі вялікімі аўтамабілямі, як джыпы. Заезды становяцца ўжо добрай традыцыяй. Тут, нягледзячы на тое, што ўсе ўдзельнічаюць у адной катэгорыі, усё па-сапраўднаму. Хуткасць, адрэналін ды эмоцыі…

 

Арганізатары падкрэсліваюць: “Галоўнае ў гэтых спаборніцтвах – даць жанчынам магчымасць праявіць сябе ў пазадарожным кіраванні”.

Галоўнае – засяродзіць увагу. Наперадзе – дарожныя перашкоды!


Можа, менавіта такія мерапрыемствы стануць штуршком да таго, каб жанчыны больш актыўна ўдзельнічалі ў агульных спаборнцітвах.

 

Аб тым што, джып-спрынт карыстаецца папулярнасцю сярод жанчын кажа і той факт, што ў гэтым годзе ён сабраў у два разы больш каманд, чым у мінулым. Ажно 12 экіпажаў! Самай сталай удзельніцы спаборніцтваў было 58 год.

 

Траса не вельмі складаная для прафесіяналаў, аднак надта разнастайная. Праходзіць яна па перасечанай мясцовасці. Экіпажам трэба было пераадольваць розныя перашкоды: пагоркі і яры, ямы ды яшчэ заснежаныя ўчасткі, высокія кусты ды стромкія павароты. З усім гэтым прыйшлося змагацца. Месца правядзення было выбрана не проста так, бо асноўны напрамак спаборніцтваў – “трофі”, а гэты накірунак праводзіцца на перасечанай мясцовасці, дзе прысутнічае не проста дарога, але і лес, балоты ды іншыя прыродныя перашкоды.

 

Мужчыны віншуюць любімых і са святам, і з праспяховым фінішам


На фінішы ўдзельніц чакалі каштоўныя прызы ды ўзнагароды: медалі і дыпломы. Сярод не-ўдзельніц таксама разыгрываліся прызы. А за апошняе  месца арганізатары прыгатавалі адмысловы прыз – універсальны кухонны камбайн.

 

Першае месца заняла (як і ў мінулым годзе) Алена Дарашкевіч.

 

Здымкі Вольгі Мілавай