Сырны фестываль, што традыцыйна стаў часткай святкавання дня горада, прашоў 17 верасня на Савецкай плошчы ў Гродне. Тут адбылася сляпая народная дэгустацыя сыроў з Гарадзеншчыны, Брэстчыны і Мінска, а таксама продаж сыроў непасрэдна вытворцамі. Апроч смачных пачастункаў было на плошчы і шмат прыхожых цікавостак – роставыя лялькі, клоўны і акрабаты не давалі сумаваць гасцям свята.
Пад час свята ў гонар 888-годдзя Гродна, 17 верасня, упершыню ў горадзе праходзіў дзіцячы ColorFest. Пляцоўку каля летняй эстрады ў парку Жылібера ўзапоўнілі дзеці і падлеткі з пакецікамі каляровых фарбаў. Ужо праз пару хвілін музыка, танцы і фарбы змяшаліся разам і дадалі святу горада весялосці і вясёлкавасці.
Гастрольныя спектаклі Мінскага ТЮГа прайшлі ў гродзенскім тэатры лялек 15 і 16 верасня. Дарослым Тэатр юнага гледача прапанаваў камедыю “Аднакласнікі” па п’есе Юрыя Куліка. Мы сустрэліся з выканаўцам гароўнай ролі п’есы, лаўрэатам нацыянальнай тэатральнай прэміі за лепшую мужчынскую ролю (2012), артыстам Аляксандрам Палазковым. Для яго Гродна – горад, дзе былі адны з першых здымкаў. А ў будынку, дзе сёння тэатр лялек, ён бачыў калісці яшчэ “Вішнёвы сад” у пастаноўцы драмтэатра. З галоўным рэжысёрам тэатра лялек Алегам Жугждам яны наогул былі аднакурснікамі. Таму герою “Аднакласнікаў” было што сказаць пра наш горад, тэатр і жыццё.
Пакуль гараджане бавілі вечар 16 верасня дома, на плошчы Леніна ішоў самы сапраўдны канцэрт. Тут ішла апошняя рэпетыцыя святкавання Дня горада. Незважаючы на цемру, артысты-удзельнікі свята адпрацоўвалі свае выхады. Нават тое, што выканаўцы выступалі на “прагоне” без канцэртных строяў, не пазбаўляла відовішча велічнасці. Напэўна, заўтрашняе свята ўразіць гледачоў не менш.
“У Зельве адмовілі, у Ваўкавыску не ўзялі, у Слоніме пабаяліся”, – такую геаграфію пошуку майстра, здольнага адрамантаваць гадзіннік 1880 года, распавёў адзін з кліентаў Аляксандра Сахарэвіча, майстра, што працуе ў гасцініцы “Беларусь”. “Пакідайце, зробім”, – прапануе майстар пасля агляду. Маўляў, не такі ўжо ён і стары, даводзілася рамантаваць і старэйшыя. “Быў вось з драўляным механізмам, больш 200 гадоў меў. Месяц з ім правазіўся, але зрабіў”.
Любы горад робіцца блізкім, калі пачнеш раптам заўважаць у ім нешта знаёмае. То прамільгне у натоўпе твар, падобны да “хатняга” сябра, то за паваротам адкрыецца пейзаж, нібыта бачаны дома. За гадзіну шпацыру па Гомелі колькі разоў мільгала думка, што я пазіраю на горад “гарадзенскімі” вачамі. У Гомелі ёсць месцы, што прызнаюцца за свае, дзе гарадзенцы запраста могуць адчуць сябе “як дома”.
Музычны тэатр “Рада” 3 верасня выступіў на фестывалі “Fest in den Hof” (Вечарынка ў двары) ў бельгійскім курортным горадзе Остэндэ на беразе Паўночнага мора. Гарадзенскія танцоры ўпершыню выбраліся на такія далёкія гастролі і былі адзінымі прадстаўнікамі Беларусі на імпрэзе. Дапамогу ў арганізацыі паездкі аказалі старшыня гарвыканкама Мечыслаў Гой і валейбольны клуб “Камунальнік”.
Многія думаюць, што пераліванне крыві гэта вельмі проста. Замацавалі на штатыве кропельніцы пакецік з донарскай крывёй і яна спакойна сабе сочыцца праз голку ў вену. Насамрэч, усё значна складаней. Трансфузіялогія, навука аб пераліванні крыві, не менш складаная за транспланталогію, дзе гаворка ідзе пра перасадку органаў. Асабліва важна правільна падабраць кроў пры аперацыях у пацыентаў-немаўлят. Менавіта гэтым займаецца адзіны ў Гродзенскай абластной дзіцячай бальніцы хірург-трансфузіёлаг Уладзімір Пруднікаў.
Высветліць асобу аднаго з падазраваных у крадзяжы дароў з цудадзейнай іконы Маці Боскай “Усецарыца” Сынкавічскай царквы дапамаглі генетычныя даследванні. Пра гэта паведамілі ў Гродзенскім упраўленні лабараторных даследванняў рэчавых доказаў біялагічнага характару. Падазраваны затрыманы, следства працягваецца.
Па панядзелках у цэнтры развіцця і адпачынку “Партал” праходзяць шахматныя сустрэчы, дзе Аляксандр Сыты, будучы матэматык-праграміст, вучыць ахвотных гуляць у даўнюю гульню і гуляе з тымі, хто гэта рабіць ужо ўмее. Сам “маэстра” атрымаў званне кандыдата ў майстры спорту па шахматах яшчэ да 18 гадоў. Ён лічыць, што гульня не толькі развівае мысленне і логіку, але і дапамагае “разрульваць” самыя разнастайныя сітуацыі. На шахматнай дошцы можна знайсці аналогіі не толькі з вайсковымі бітвамі, але з любымі з’явамі жыцця – ад лагістыкі да кахання.
