Паліклінікі не спраўляюцца: на дапамогу лекарам адправілі студэнтаў гродзенскага медуніверсітэта і медычнага каледжа

Студэнты Гродзенскага медычнага ўніверсітэта з 2 лютага дапамагаюць спецыялістам у паліклініках. З 7 лютага на дапамогу лекарам адправяць студэнтаў Гродзенскага медычнага каледжа. Гэта звязана з павялічэннем колькасці захварэлых на каранавірус, паведаміла «Гродзенская праўда».

У гродзенскія паліклінікі медуніверсітэт накіраваў 126 студэнтаў шостага курса лекарскага факультэта і 50 педыятрычнага. Таксама ў кол-цэнтрах працуюць 20 студэнтаў медыка-дыягнастычнага факультэта. Як валанцёраў накіравалі 30 студэнтаў медыка-псіхалагічнага факультэта. Яны займаюцца дастаўкай рэцэптаў для пацыентаў.

Паводле загада міністра аховы здароўя Дзмітрыя Піневіча, ад 1 лютага ў паліклініках студэнты маюць права выпісваць рэцэпты, а таксама афармляць бальнічныя лісткі. Ва ўніверсітэце студэнтам правялі адпаведны інструктаж.

Куратарам для студэнтаў прызначылі намеснікаў галоўнага лекара па лекарскай працы, загадчыкаў паліклінічных аддзяленняў, а таксама выкладчыкаў медуніверсітэта.

Чытайце таксама:

«Стаю ў чарзе дзве гадзіны. На вуліцы чалавек 30, унутры таксама». Ці ёсць чэргі на прыём да тэрапеўта ў гродзенскіх паліклініках

Мінздароўя: паліклінікі будуць працаваць без выхадных. Што адбываецца з каранавірусам ў Беларусі