У паліклініцы № 3 Гродна прыбралі банер пра гісторыю жыцця Саламеі Русецкай — першай у гісторыі Рэчы Паспалітай жанчыны-урача. На яго паскардзілася актывістка Вольга Бондарава. Гродзенскія ўлады з ёй пагадзіліся.
«У канцы мая ў паліклініцы № 3 г. Гродна быў знойдзены банер, які праслаўляе польскую авантурніцу Саламею Русецкую. Яна выдавалася за „гонар Беларусі“. Акрамя таго, руская мова называлася „замежнай“ для беларусаў, — напісала Ольга. — Многіх гэта абурыла, лісты паляцелі мне ў лічку і ў гарвыканкам».
Саламея Русецкая — першая ў гісторыі Рэчы Паспалітай жанчына-лекар. Аўтарка мемуараў, асветніца. Аўтарка прыгодніцкага рамана «Авантуры майго жыцця».
Таксама Бондаравай не спадабаліся «бчб-лялькі» і манітор «з рэкламай швейцарскага Чырвонага Крыжа». Супрацоўнікі Беларускага таварыства Чырвонага Крыжа дзяжурылі падчас акцый пратэсту ў 2020 годзе. Міжнародны Камітэт Чырвонага Крыжа дапамагаў людзям, закранутым канфліктам на тэрыторыі Украіны.
Кіраўніцтва паліклінікі будзе ўзгадняць банеры
Скаргу накіравалі кіраўніцтву паліклінікі і ў аддзел ідэалагічнай працы і па справах моладзі Гродзенскага гарвыканкама.
Пасля звароту інфармацыйны плакат аб Саламеі Русецкай выдалілі, адказала на зварот Вольгі намесніца старшыні гарвыканкама Зоя Кулеша. Яна размясціла адказ Telegram-канале. «А кіраўніцтва медустановы прыбрала выставу і сумнеўны відэаролік. Манітор на месцы», — паведаміла Бондарава. Галоўнага лекара Гарадской паліклінікі № 3 Гродна Вольгу Лукашук і яе намеснікаў абавязалі ўзгадняць інфармацыю, якая размяшчаецца ва ўстанове.
Начальнік Галоўнага ўпраўлення ідэалагічнай работы і па справах моладзі Гродзенскага аблвыканкама Ігар Булаўка ў канцы чэрвеня пацвердзіў інфармацыю.
Кім заменяць Русецкую?
Кулеша паведаміла, што ў якасці «выбітных медыцынскіх работнікаў» раскажуць пра:
- Зіновія Салаўёва (рэвалюцыянер, адзін з арганізатараў савецкага аховы здароўя, намеснік наркама аховы здароўя РСФСР, заснавальнік «Артэка»),
- Канстанціна Кемарскага (акушэр-гінеколаг, грамадскі дзеяч, доктар медыцыны, стацкі саветнік, дырэктар Гродзенскай павівальнай школы і Гродзенскай акушэрска-фельчарскай школы, арганізатар аховы здароўя, і сярэдняй медыцынскай адукацыі ў Гродзенскай губерні),
- Васілія Гіндэнбурга (медык, турэмны лекар).
