Будынак на вуліцы Курчатава ў якім забілі замежнага грамадзяніна. Крыніца: MOST
Аляксандр Лукашэнка 21 сакавіка сабраў нараду з сілавікамі. Праз два дні пасля забойства замежнага грамадзяніна ў Гродне ён пракаментаваў сітацыю. Што яшчэ кажуць пра здарэнне з удзелам меркаванага «тэрарыста» і спецпадраздзялення КДБ «Альфа», даведаўся Hrodna.life.
«Спецслужбы спрацавалі бліскуча. Канфіскаваны цэлы арсенал зброі і выбухоўкі, якія прызначаліся для „гучных“ тэрактаў у дачыненні да грамадзян і службовых асоб дзяржаўных органаў. За што малайцы нашы хлопцы — пры такой вострай сітуацыі, калі з боку тэрарыстаў ужываліся гранаты і зброя, не загінуў ні адзін супрацоўнік групы „Альфа“. Добрая аперацыя, добрая праца», — сказаў Лукашэнка.
Грамадзяніна якой краіны забілі сілавікі, Лукашэнка не паведаміў. Паводле неправеранай інфармацыі «Нашай нівы», у Гродне «Альфа» забіла грамадзяніна адной з дзяржаў Еўрасаюза.
UPD: У час штурму кватэры замежнік пачаў страляць у сілавікоў з аўтамата Калашнікава і кінуў у іх бок гранату, сцвярджаюць у рэпартажы БТ. Група «Альфа» пачала страляць у адказ і раніла мужчыну. Ён памёр у час перавозкі ў бальніцу. Паводле дакументаў гэта быў расіянін Аляксей Ламакін 1981 года нараджэння. Сілавікі сцвярджаюць, што гэта падробныя дакументы.
У здымнай кватэры потым нібыта знайшлі аўтамат калашнікава, патроны да яго і гранату Ф-1. Мужчына быццам здзяйсняў даразведку месцаў для тэрактаў. У сюжэце БТ кажуць, што гэта былі будынкі КДБ па Гродзенскай вобласці і УУС Гродзенскага аблвыканкама, чыгуначны вакзал і прамысловыя аб’екты, кватэры сілавікоў.
На тэлеканале «СТВ» паказалі пашпарт забітага. У яго тэлефоне былі фота кіраўнікоў сілавых структур Гродзенскай вобласці і мясцовых чыноўнікаў, а таксама геалакацыі месца іх пражывання. Паводле сілавікоў, на трасе «Гродна — Астрыно» знайшлі пяць кілаграм пласціда і электронных выбуховак.
«Мы жывем прыкладна за 500 метраў ад таго месца, дзе ўсё адбывалася. Былі дома ў гэты час. Ну чулі зусім нічога», — сказала чытачка «Радыё Свабода».
«Выглядае ўсё як інсцэнізацыя і нейкая правакацыя. Не разумею, што адбываецца, маю толькі здагадкі. Магчыма, гэта вагнэраўцы якія, у каго яшчэ можа быць тут, у Беларусі, зброя, і адкуль яе маглі прывезці, як не з Расіі? Кажуць, што зліквідавалі нейкага замежніка, і гэта таксама дзіўна гучыць. Чаму не назваць, што за замежнік? Каб быў які паляк ці ўкраінец, то раструбілі б ужо па ўсіх каналах. Усё шукаюць схаваныя ячэйкі, кожны дзень затрыманні. Што яшчэ нафантазіююць? Адзінае, што можна сказаць дакладна, — мы цяпер закладнікі, пешкі ў нейкай вялікай гульні», — сказалі чытачы тэлеканала «Белсат».
«Я не ў курсе [таго, што адбылося], але ўсе на месцы. Ніхто нічога пакуль не казаў», — сказала супрацоўніца прыёмнай старшыні гродзенскага аблвыканкама Уладзіміра Караніка журналістцы zerkalo.io.
Ва ўпраўленні унутраных спраў Гродзенскага аблвыканкама з журналістамі zerkalo.io размаўляць адмовіліся. У Камітэце дзяржаўнай бяспекі рамаўляць і ўдакладняць дэталі не захацелі. «Калі будзе такая неабходнасць, то ўсе падрабязнасці будуць апублікаваны. Калі такой неабходнасці не будзе — значыцца, не будуць».
«Распаўсюджваюцца фэйкавыя імёны, я ведаю, што некаторым СМІ дасылалі імя і прозвішча нібыта застрэленага беларуса. Мы правяралі, такіх людзей не існуе», — сказаў кіраўнік аб’яднання былых сілавікоў BYPOL Аляксандр Азараў.
Паводле яго словаў, падрабязнасцяў інцыдэнта каля дома Уладзіміра Караніка у BYPOL таксама няма. Ён мяркуе, што гэта можа быць «укід».
На вуліцы Курчатава ў Гродне забілі замежніка. Гэта адбылося 19 сакавіка 2023 года. Грамадзяніна спрабавалі затрымаць падчас аперацыі па «спыненні дзейнасці асоб, якія праніклі на тэрыторыю Рэспублікі Беларусь з мэтай здзяйснення тэрарыстычнай акцыі».
Мужчына нібыта хацеў аказаць узброены супраціў байцам спецпадраздзялення КДБ «Альфа» і выкарыстаць аўтаматычную зброю і баявыя гранаты. КДБ узбудзіў крымінальную справу.
20 сакавіка 2023 года стала вядома, што на беларуска-польскай мяжы ў пункце пропуску «Казловічы» пачаліся масавыя допыты кіроўцаў грузавікоў. Кіроўцаў з чаргі выклікалі ў кабінет, апытвалі і правяралі тэлефоны. Разам з памежнікамі на мяжы працаваў КДБ.
На “Гродна Азот” 2 траўня 2024 года адбылася атака кіберпартызанаў. З сістэмы выдалілі дадзеныя сотняў…
Гродзенец Ежы Грыгенча патрапіў пад спецвытворчасць. Працэс супраць мужчыны пачалі 2 траўня 2024 года. Ежы…
Польскія візавыя цэнтры ў Гродне і Лідзе паднялі цэну сэрвіснага збору. Зараз пры падачы на…
Найхутчэйшы рост цэн на харчовую прадукцыю ў Беларусі назіраецца ў Гродзенскай вобласці. За першы квартал…
Гродзенскіх школьнікаў прывялі ў ізалятар часовага ўтрымання. Гэта адбылося ў межах экскурсіі, паведаміла прэс-служба Упраўлення…
У цэнтры Гродна дабудоўваюць офіс IT-кампаніі “Афранс”. Ён будзе складацца з двух будынкаў на вуліцы…