Анатоль Іванюк стаў новым пракурорам Гродна. Раней ён быў намеснікам пракурора Гродзенскай вобласці. Былы ж пракурор горада Уладзімір Клішын заняў месца Іванюка. Фактычна, пракуроры памяняліся месцамі. Пра ратацыю паведаміў «Гродна плюс».

У Гродне прызначылі новага пракурора горада. Што здарылася са старым?
Анатоль Іванюк. Крыніца: grodnonews.by

Пасля прэзідэнцкіх выбараў 2020 года Анатоль Іванюк выказваўся пра пратэсты і тое, што грамадства «накальваюць звонку, мэтанакіравана распальваючы супрацьстаянне і канфлікты на глебе палітычных поглядаў».

Чым запомніўся Клішын на сваёй пасадзе

Уладзімір Клішын

  • 53 гады,
  • Нарадзіўся ў Гродне.
  • Скончыў юрыдычны факультэт Гродзенскага дзяржаўнага ўніверсітэта ім. Янкі Купалы ў 1995 годзе па спецыяльнасці «правазнаўства».
  • У маладосці гуляў у футбол з журналістамі незалежных СМІ, грамадскімі дзеячамі і апазіцыянерамі.
  • На пасаду пракурора горада ўступіў у 2013 годзе пасля аб’яднання пракуратур Ленінскага і Кастрычніцкага раёнаў у чыне старэйшага дарадцы юстыцыі. Да таго ўзначальваў пракуратуру Кастрычніцкага раёна. Працу ў пракуратуры пачынаў як стажор памочніка пракурора Ленінскага раёна.
  • З 2014 года Клішын — член Гродзенскага гарадскога савета дэпутатаў ад Дамброўскай выбарчай акругі (№ 8).
  • Пракурора Гродна Уладзіміра Клішына ўзнагародзілі ордэнам Пашаны. Адпаведны ўказ падпісаў Лукашэнка 15 лютага 2022 года. Клішын атрымаў узнагароду «за асаблівыя заслугі ва ўмацаванні дзяржаўнай бяспекі і барацьбе са злачыннасцю, плённую дзяржаўную і грамадскую дзейнасць».
У Гродне прызначылі новага пракурора горада. Што здарылася са старым?
Уладзімір Клішын. Скрыншот з «Гродна Плюс»

Уладзімір Клішын і рэпрэсіі

Пасля выбараў 2020 года Уладзімір Клішын быў адным з тых, хто кіраваў рэпрэсіямі ў горадзе. У жніўні 2020 года ён сустракаўся з работнікамі «Гроднажылбуда», выступаў перад калектывам «Хімвалакно».

Па заявах Уладзіміра Клішына былі прызнаныя экстрэмісцкімі шэраг гродзенскіх Telegram-каналаў, у тым ліку былы канал Hrodna.life. Таксама Клішын выступаў заяўнікам па ліквідацыі праз суд грамадскіх арганізацый і аб’яднанняў. Па пазове Уладзіміра Клішына суд прыняў рашэнне аб ліквідацыі «Цэнтра гарадскога жыцця» і ТАА «Гродна Лайф медыя».

У ліпені 2021 года пракурор выдаў афіцыйнае папярэджанне галоўнаму рэдактару Hrodna.life Аляксею Шоце аб адказнасці за парушэнне артыкула 23.5, 198−1 і 361 КаАП і артыкула 361−4 Крымінальнага кодэкса (парушэнне закона аб СМІ, заклікі да дзеянняў, накіраваных на прычыненне шкоды нацыянальнай бяспецы Беларусі і садзейнічанне экстрэмісцкай дзейнасці).

Выступаў у ролі дзяржабвінаваўцы на працэсах па справах прызнанага палітвязнем Канстанціна паляка і Дзмітрыя Зімніцкага, абскарджанні прысуду Вадзіму Плаўскаму.

Уладзімір Клішын выклікаў рэдактара сайта Znadniemna.pl журналіста Анджэя Пісальніка на размову, а на наступны дзень яго з жонкай прымусова завезлі ў Менск на допыт у Следчы камітэт.

Уладзімір Клішын лічыць, што відэаназіранне — самы эфектыўны спосаб выявіць хуліганства на гарадскіх вуліцах.