Мікрараён Паўднёвы-1 на 22 тысячы жыхароў пачнуць будаваць каля Альшанкі пасля 2028 года. Планамі вялікай будоўлі вельмі незадаволеныя жыхары вуліц Верхняй з былога пасёлка Паўднёвы, Садакова і Малахавіч. Ужо хутка іх дамы на ўскрайку поля ператворацца ў дамы на ўскрайку раёна высотак. Ад платоў на Верхняй вуліцы да першых шматпавярховак будзе ўсяго 60 метраў. Дастанецца і гмахам: на іх будуць дзьмуць вятры з «Хімвалакна» і паляцяць пылавыя буры з палёў.

Завяршыць будаўніцтва новага мікрараёна збіраюцца да 2030 года. Вуліца Верхняя будзе непасрэдна межаваць з новым раёнам. Зямлю пад катэджы яе жыхары атрымалі паводле чаргі каля 14 гадоў таму, піша «Вячэрні Гродна». Зараз тут ціхі раён з дыхтоўнымі дамамі на ўскрайку поля.

Пяць гадоў таму яе жыхарам абяцалі, што на полі дабудуюць няцотны бок вуліцы і вялікі парк, дзеліцца адна з жыхарак Верхняй. Пра шматпавярховікі казалі, што яны з’явяцца далей, за высахлай сажалкай. «Калі б я ведала, што вышынныя дамы пабудуюць проста перад нашымі дамамі, не брала б тут участак», — кажа яна.

Жыхары «разумеюць, што забудова ўсё роўна будзе». Але просяць знайсці кампраміс:

  • адсунуць гмахі далей;
  • засадзіць прастору паміж вуліцай і гмахамі дрэвамі, зрабіць паркавую зону;
  • знізіць колькасць паверхаў да пяці ці ўвогуле забудаваць тэрыторыю прыватнымі дамамі або таунхаусамі;
  • двухпалосную дарогу паміж цяперашняй вуліцай і новым раёнам жыхары просяць зрабіць тупіковай, каб не баяцца выпускаць дзяцей з дамоў;
  • вынесці кантэйнерныя пляцоўкі як мага далей ад Верхняй, каб смецце не раскідвалі па вуліцы.

Цяперашнюю пад’язную гравійку жыхары Dерхняй рабілі за свой кошт. На яе сышло 30 самазвалаў пяску.

Машыны — у крытыя паркінгі або пад суседнія платы?

Турбуе і вечная праблема з паркоўкамі. Па канцэпцыі распрацоўшчыкаў праекта, у раёне будзе 40% ад неабходнай колькасці парковачных месцаў. Астатнія 60% размесцяць у крытых паркінгах у 800-метровай даступнасці ад кожнага квартала. Жыхары навакольных вуліц не вераць, што будучыя суседзі стануць паркавацца за 800 метраў ад дома і з торбамі ісці да кватэры. Яны дапускаюць, што месцы ў паркінгах будуць платнымі, таму машыны з новага мікрараёна апынуцца ля платоў іх дамоў.

Праблема з вуліцай Садакова ўжо ёсць і так

Нельга будаваць новы раён, не вырашыўшы існуючыя праблемы старой забудовы, перакананы грамадскі актывіст і эколаг Яўген Філімонаў.

Па вуліцы Садакова ўжо зараз ездзіць шмат транспарту: вялікагрузы, аўтобусы, легкавушкі, ровары. Яны часта канфліктуюць, бо вуліца вузкая. Па падліках эколага, раніцай па вуліцы праязджае ад 15 да 20 машын на хвіліну. З з’яўленнем новага мікрараёна транспартная нагрузка вырасце яшчэ больш.

Эколаг прапануе:

  • абмежаваць максімальную хуткасць на Садакова да 40 км/г;
  • пашырыць дарогу ад трасы на Бросты да кальца ля Паўднёвага рынку і перанакіраваць паток машын туды.

Сам экаголаг лічыць, што ўчастак паміж Альшанкай і Малахавічамі трэба не забудоўваць шматпавярхоўкамі, а ператварыць у зону адпачынку, дзе можна было б пагуляць. Такой дагэтуль няма ні ў Альшанкі, ні ў Паўднёвага.

Шматпавярховая забудова павысіць узровень шуму, зацяніць прыватныя дамы. Вуліцы Садакова і Верхняя ператворацца ў транзітныя. Па іх, прынамсі, першы час, навасельцы будуць дабірацца ў свае дамы, звяртае ўвагу Grodno.in.

Пыльныя буры — на новабудоўлі. Што кажа забудоўшчык

Праблему транзітнасці вузкіх вуліц забудоўшчыкі абяцаюць вырашыць, калі разам з новым мікрараёнам дабудуецца частка дарогі, якая замыкае вялікае аб’язное кола. Туды пусцяць увесь аўтамабільны трафік, разгрузіўшы ўнутраныя дарогі. Праблемы з заторамі павінна вырашыць ДАІ схемай працы святлафораў і дадатковымі разметкамі.

Шум павінна будзе пагасіць адлегласць у 60 метраў паміж прыватнымі дамамі і гмахамі. Усе нормы тут вытрыманыя, сцвярджаюць у «Гроднаграмадзянпраекце».

Па ружы вятроў вецер ад «Хімвалакна» і птушкафабрыкі будзе дзьмуць па дыяганалі праз увесь мікрараён, па дзіцячых садках, школах і жылых дамах. Распрацоўшчыкі праекта гэта прызнаюць. Прызнаюць яны і тое, што штогадовыя пылевыя буры з палёў, з якой сутыкаюцца жыхары Альшанкі кожнае лета, дастануцца шматпавярхоўкам.

Жыхары вуліцы Верхняй і іншых суседніх вуліц склалі калектыўны зварот у Гродзенскі гарвыканкам. Яго аднеслі туды 26 траўня, у апошні дзень грамадскіх абмеркаванняў. Зварот падпісалі 52 чалавекі.

Чытайце таксама: У Гродне каля Альшанкі пабудуюць яшчэ два мікрараёны