Гродзенскаму гісторыку Аляксандру Краўцэвічу, якому ў верасні 2023 года споўнілася 65 гадоў, прызначылі пенсію. Яна складае 220 рублёў у месяц ($ 70). Пра гэта гісторык напісаў на сваёй старонцы ў Facebook.
«Ура! „Сацыяльна арыентаваная дзяржава“ (так мне сказалі ў райсабесе) прызначыла для мяне штомесячную пенсію ў памеры 220 руб. (70 $)! Цяпер зажыву!», — напісаў Краўцэвіч у Facebook.
Аляксандр Краўцэвіч — беларускі гісторык і археолаг. Доктар гістарычны навук, прафесар. Лаўрэят Прэміі імя Францішка Багушэвіча. Працаваў у Гродзенскім дзяржаўным універсітэце імя Янкі Купалы. У 2013 годзе яго звольнілі з ГрДУ імя Янкі Купалы. У кастрычніку 2020 года Краўцэвіча затрымалі і ён тры дні знаходзіўся ў ізалятары. Пасля гэтага, яго асудзілі на штраф у 10 базавых велічынь (270 рублёў).
Што Аляксандр Краўцэвіч зможа набыць за 220 рублёў у месяц
На 220 рублёў у краме «Еўраопт» можна набыць:
- тры дзясяткі яек «Залатых»;
- пяць кілаграм таматаў;
- пяць кілаграм морквы «Сталовай»;
- пяць кілаграм бульбы;
- пяць кілаграм яблыкаў;
- 10 бутэлек мала «Малочны свет» аб’ёмам 1,45 л;
- 10 боханаў хлеба «Траецкі» па 560 г. за бохан;
- 10 кг «Лідскай» мукі вышэйшага сорту;
- 10 кг «Гарадзейскага» цукру;
- 1,5 кг «Галёнкі кураня бройлера»;
- адзін кілаграм свінога фарша;
- пачак пяльменяў «Бабушка Аня — Домашние» вагой 1 кг.
Чытайце таксама: «Інтэрв'ю каштавалі мне працы ва ўніверсітэце». Гродзенскаму гісторыку Алесю Краўцэвічу — 60
Першы кіраўнік незалежнай Беларусі атрымоўваў пенсію $ 2
У 1997 годзе Аляксандр Лукашэнка адмяніў пастанову парламента аб пажыццёвай пенсіі былым прэм’ер-міністрам і кіраўнікам дзяржавы ў памеры 70−75% ад аклада дзейнічаючых прэм’ер-міністра і спікера.
У 1996 годзе першы кіраўнік незалежнай Беларусі Станіслаў Шушкевіч атрымоўваў пенсію ў памеры 3,2 млн рублёў ($ 300). Пасля дэнамінацыі 2000 года пенсія Шушкевіча была 3,3 тыс. рублёў, што было эквівалентна $ 1,9.
Шушкевіч звяртаўся ў структуры, якія мелі права рабіць запыты ў Канстытуцыйны суд, а таксама ў СМІ, каб даказаць неправамернасць дзеянняў Лукашэнкі, але гэта было безвынікова.
Пазней жонка Станіслава Шушкевіча аформіла дакументы на атрыманне ім звычайнай пенсіі па ўзросце і з 2015 года яго пенсію павысілі да 500 рублёў у месяц (каля $ 200). Акрамя гэтага, Шушкевіч жыў за кошт лекцый, якія ён чытаў у Гарвардскім, Йельскім і Калумбійскім універсітэтах.
