Пасля запланаванай аперацыі ў Ваўкавыску памёр Мікалай Аксаміт — былы дэпутат БНФ у Вярхоўным Савеце 12-га склікання. Ён галасаваў за незалежнасць Беларусі ў 1991 і пратэставаў супраць лукашэнкаўскага рэферэндуму ў 1995. Яму было 69 гадоў. Пра смерць былога дэпутата паведаміла Радыё Свабода.
Развітанне з Мікалаем Аксамітам пройдзе 29 студзеня з 19:00 да 21:00 у зале рытуальных паслуг у гарадской бальніцы Ваўкавыска. Адпяванне ў царкве ў мікрараёне адбудзецца 30 студзеня, а 14:00, паведаміў канал «Суды, задержания. Гродно и область».
Мікалай Аксаміт скончыў тэатральна-мастацкі інстытут у Мінску, быў мастаком-афарміцелем. У 1990 годзе яго выбралі дэпутатам Вярхоўнага Савета БССР 12-га склікання ад Ваўкавыскай гарадской выбарчай акругі № 248.
У 1990 годзе Мікалай Аксаміт удзельнічаў у распрацоўцы Дэкларацыі аб дзяржаўным суверэнітэце. Галасаваў за абвяшчэнне незалежнасці Беларусі 25 жніўня 1991 г. Быў членам Камісіі Вярхоўнага Савета па адукацыі, культуры і захаванні гістарычнай спадчыны.
11−12 красавіка 1995 года ён удзельнічаў у галадоўцы дэпутатаў Апазіцыі БНФ супраць ініцыяванага Лукашэнкам рэферэндуму аб скасаванні беларускай мовы як адзінай дзяржаўнай, скасаванні статусу дзяржаўных сімвалаў бел-чырвона-белага сцяга і гербу «Пагоня», інтэграцыі з Расіяй і праве прэзідэнта распускаць парламент. Быў жорстка збіты падраздзяленнямі КДБ і МУС.
Працаваў у праваабарончым цэнтры «Аслона».
У 2004 годзе быў даверанай асобай Мікалая Аўтуховіча на выбарах у палату прадстаўнікоў. Пасля выбараў два тыдні трымаў галадоўку ў знак пратэсту супраць фальсіфікацыі вынікаў галасавання.
У 2018 годзе быў узнагароджаны медалём Рады БНР да 100-годдзя абвяшчэння незалежнасці Беларускай Народнай Рэспублікі.
Чытайце таксама:
