У гродзенскім пабрыгіцкім касцёле 8 красавіка асвяцілі два новыя бакавыя алтары — у гонар святой Брыгіты і навагрудскіх мучаніц-назарэтанак. Асвячэнне рабіў былы мітрапаліт Мінска-Магілёўскі архіепіскап Тадэвуш Кандрусевіч.
У дзень Звеставання адбылася ўрачыстая імша, у час якой асвяцілі новыя алтары, паведаміў каталіцкі партал Гродзенскай дыяцэзіі grodnensis.by.
![Асвячэнне новых алтароў пабрыгіцкага касцёла](https://dzh7f5h27xx9q.cloudfront.net/wp-content/uploads/2024/04/altary_pabrygicki__1.webp)
![Асвячэнне новых алтароў пабрыгіцкага касцёла](https://dzh7f5h27xx9q.cloudfront.net/wp-content/uploads/2024/04/altary_pabrygicki__2.webp)
![Асвячэнне новых алтароў пабрыгіцкага касцёла](https://dzh7f5h27xx9q.cloudfront.net/wp-content/uploads/2024/04/altary_pabrygicki__3.webp)
![Асвячэнне новых алтароў пабрыгіцкага касцёла](https://dzh7f5h27xx9q.cloudfront.net/wp-content/uploads/2024/04/altary_pabrygicki__5.webp)
![Асвячэнне новых алтароў пабрыгіцкага касцёла](https://dzh7f5h27xx9q.cloudfront.net/wp-content/uploads/2024/04/altary_pabrygicki_.webp)
![Асвячэнне новых алтароў пабрыгіцкага касцёла](https://dzh7f5h27xx9q.cloudfront.net/wp-content/uploads/2024/04/altary_pabrygicki__7.webp)
![Асвячэнне новых алтароў пабрыгіцкага касцёла](https://dzh7f5h27xx9q.cloudfront.net/wp-content/uploads/2024/04/altary_pabrygicki__8.webp)
Алтары адноўленыя ў спрошчаных формах. Багатага дэкору, які бачны на гістарычных здымках, няма, звяртае ўвагу канал «Спадчына». Таксама ў правым алтары замест гістарычнага абраза, які напісала першая настаяцельніца назаратанскага (былога брыгіцкага) манастыра Паўла (Марыя Гажыч) размясцілі абраз святой Брыгіты. Арыгінальны абраз — святы Клімент — зараз размешчаны справа ад цэнтральнага алтара.
![Скульптура з касцёлу Дабравешчання Найсвяцейшай Дзевы Марыі (пабрыгіцкага)](https://dzh7f5h27xx9q.cloudfront.net/wp-content/uploads/2024/04/altary_pabrygicki__9.webp)
![Скульптура з касцёлу Дабравешчання Найсвяцейшай Дзевы Марыі (пабрыгіцкага)](https://dzh7f5h27xx9q.cloudfront.net/wp-content/uploads/2024/04/altary_pabrygicki__10.webp)
![Інтэр'ер з пабрыгіцкага касцёла](https://dzh7f5h27xx9q.cloudfront.net/wp-content/uploads/2024/04/altary_pabrygicki__11.webp)
Аўтэнтычныя інтэр'еры касцёла знішчылі ў савецкі час. Толькі ў 1990 г. касцёл ізноў вярнуўся да вернікаў і цяпер марудна, але няўхільна ідзе ягонае аднаўленне. Адметныя скульптуры і разное начынне нядаўна экспанавалі на выставе беларускай скульптуры XVII-XVIII стагоддзяў у Нацыянальным мастацкім музеі. Канал «Спадчына» называе стыль, у якім яно выканана, «храстковым».
![Гістарычнае фота інтэр'ераў пабрыгіцкага касцёла](http://dzh7f5h27xx9q.cloudfront.net/wp-content/uploads/2020/05/wnetrz-3-752x1024.jpg)
Галоўны алтар брыгіцкага касцёла ўрачыста адкрылі пасля рэканструкцыі ў жніўні 2020 года. Яго на працягу года аднаўлялі па старых фатаграфіях. Гэта дакладная копія алтара, які быў усталяваны ў храме ў 17 стагоддзі.
У пабрыгіцкім касцёле для турыстычных груп адкрыты падвалы храма і былога кляштара. Там знаходзіцца невялікі музей з розных каштоўнасцей, што захаваліся ў касцёле. Экскурсіі праводзіць рэктар касцёла Антоні Грэмза. Трапіць у падвалы можна па папярэднім запісе.
Чытайце таксама: У гродзенскім драўляным лямусе да канца года хочуць адкрыць музей. Што ў ім будзе?