За 25 гадоў колькасць школ у Гродзенскай вобласці зменшылася з 658 да 325. Рэдакцыя Hrodna.life прааналізавала лічбы галоўнага статыстычнага ўпраўлення Гродзенскай вобласці да Дня настаўніка.
У 2000/2001 навучальным годзе ў вобласці працавала 658 школ. Праз дзесяць гадоў іх засталося 441. На пачатак 2024/2025 навучальнага года паводле статыстыкі ў рэгіёне ёсць 325 устаноў агульнай сярэдняй адукацыі. Яны ўключаюць:
- 8 пачатковых школ,
- 31 базавую,
- 262 сярэдніх,
- 24 установы спецыяльнай адукацыі.
«Аптымізацыя» школ і не толькі
Школ у Беларусі становіцца менш ужо некалькі гадоў запар. У асноўным гэта звязана з закрыццём устаноў у вёсках. Улады называюць такія працэсы «аптымізацыяй».
Яна закранае ўсю сацыяльную сферу. Напрыклад, у 2024 годзе ў нашым рэгіёне закрылі 12 бюджэтных «арганізацый сацыяльнай сферы». Гэта дзіцячыя садкі, школы, гурткі па інтарэсах, каледжы, універсітэты. Яшчэ 18 — рэарганізавалі.
Як пісала выданне «Позірк», пра гэтае скарачэнне паведамляў начальнік галоўнага фінансавага ўпраўлення аблвыканкама Павел Ашурык у матэрыяле часопіса «Фінансы. Улік. Аўдыт». Так удалося сэканоміць 4,6 млн рублёў.
На 2025 год у аблвыканкама таксама былі планы на «аптымізацыю»: меркавалася закрыць чатыры ўстановы адукацыі і дзве ўстановы культуры і рэарганізаваць яшчэ тры навучальныя ўстановы. Гэта, па падліках чыноўніка, у сваю чаргу магло прывесці да скарачэння да 200 штатных работнікаў.
Колькі настаўнікаў працуе
Ва ўсіх школах рэгіёна працуюць 11 860 настаўнікаў, уключаючы сумяшчальнікаў. Большая частка — у гарадах (8 733 педагогі). У сельскіх школах працуе 3 127. Толькі ў Гродне — каля 3 800 настаўнікаў, гэта значыць, амаль палова гарадскіх кадраў.
Для параўнання: у 2021−2022 гадах педагогаў было на тысячу больш — 12 831. З іх у гарадскіх школах працавала 9 166 чалавек, а ў сельскіх — 3 665. Гэта значыць скарачэнні закранулі як гарадскія школы, так і сельскія.
