Гродна прызналі найлепшым абласным цэнтрам краіны па выніках Года добраўпарадкавання. Адпаведную пастанову падпісаў прэм’ер-міністр Аляксандр Турчын.
UPD 18 сакавіка. На наступны дзень пасля аб’яўлення пераможцаў Андрэй Хмель выступіў з заявай. Ён назваў перамогу “агульнай”, а таксама адзначыў, што гэта стане “лепшай рэкламай гораду”. Як патрацяць выйграныя грошы (360 тыс. руб.), кіраўнік Гродзенскага гарвыканкама не агучыў.
Гродзенец адправіў зварот і пацікавіўся ў гарвыканкаме, на што пойдзе выйграная сума. Адказ выканкаму патрапіў у рэдакцыю Hrodna.life. Паводле яго, “грашовую прэмію размяркуюць згодна з нормамі заканадаўства”. Дадатковых падрабязнасцей гродзенцу не паведамілі.
Усяго пераможцаў выбіралі ў пяці катэгорыях. Сярод абласных цэнтраў і Мінска першае месца заняў менавіта Гродна. Абласны цэнтр набраў 298 балаў.
Сярод гарадоў з насельніцтвам больш за 50 тысяч жыхароў найлепшымі сталі Ліда і Наваполацк. У катэгорыі гарадоў і гарадскіх пасёлкаў з насельніцтвам ад 10 да 50 тысяч жыхароў перамаглі Астравец, Заслаўе і Пружаны.
Лідскі раён таксама прызналі адным з найлепшых
Сярод невялікіх гарадоў і пасёлкаў (да 10 тысяч жыхароў) адзначаны Чашнікі, Чэрыкаў, Бялынічы і гарадскі пасёлак Акцябрскі.
Таксама вызначылі найлепшыя сельскія населеныя пункты. У іх ліку вёска Домжарыцы Лепельскага раёна, аграгарадок Акцябрская Віцебскага раёна, аграгарадок Кароцькі Кармянскага раёна, аграгарадок Шэні Пружанскага раёна і вёска Ляскавічы Іванаўскага раёна.
Акрамя таго, найлепшымі прызнаны Гомельская вобласць і сем раёнаў краіны: Бярозаўскі, Чашніцкі, Калінкавіцкі, Лідскі, Маладзечанскі, Шклоўскі і Першамайскі раён Мінска.
Колькі грошай атрымае Гродна
Пераможцаў конкурсу ўзнагародзяць пераходным вымпелам і грашовымі прэміямі, якія выдзеляць з рэспубліканскага бюджэту. Так, напрыклад, Ліда атрымае прэмію ў 3000 базавых велічынь — 135 тысяч рублёў, а Гродна — 8000 базавых велічынь — 360 тысяч рублёў.
