Аляксандр Лукашэнка падпісаў указ, які ўводзіць некаторыя льготы для ўладальнікаў электракараў. Што зменіцца, наколькі наогул беларускае заканадаўства спрыяе развіццю электраруху і як стымулююць набываць электрамабілі ў іншых краінах, разбіраўся Hrodna.life.
Згодна з указам № 273 «Аб стымуляванні выкарыстання электрамабіляў» з 14 кастрычніка для ўладальнікаў электрамабіляў адменены дарожны збор.
Шмат не зэканоміш
Дакумент павінен стымуляваць попыт на электрамабілі, а таксама стварэнне зараднай і сэрвіснай інфраструктуры. У прыватнасці, уладальнікі электрамабіляў вызваляюцца ад пошліны за допуск да ўдзелу ў дарожным руху.
Такім чынам, уласнікі электрамабіляў за год будуць эканоміць ад 3 да 11 базавых — ад 73,5 да 269,5 рублёў.
Пры гэтым мытныя пошліны на электрамабілі ў Беларусі застаюцца нязменнымі. Сёння для фізічных асоб мыта складае 54% ад вартасці аўто. Апроч мыта пры ўвозе аўтамабіля ў краіну трэба аплаціць збор за мытнае афармленне. Таксама ў поўным памеры давядзецца аплаціць утылізацыйны збор: ад 495 рублёў за аўтамабіль узростам да трох год і 742,5 рублёў за аўтамабіль старэйшы за тры гады.
Толькі лічбы
У якую суму абыйдзецца электрамабіль, набыты за мяжой за 10 000 еўра, пасля сплаты мытных і іншых плацяжоў? Мытная пошліна складае 54% ад вартасці аўтамабіля, у нашым выпадку — 5400 еўра. Плюс 200−330 еўра ўтылізацыйнага збору і паслугі мытнага афармлення — каля 50 еўра.
Мытня мае права не прымаць дадзеную вамі вартасць аўтамабіля, а карыстацца сваімі каталогамі, цана ў якіх нярэдка значна вышэй за тую, што вы маглі заплаціць за свой аўтамабіль.
На фоне такіх збораў, падтрымка развіцця электрамабільнага руху ў Беларусі шляхам адмены дарожнага збору ў 33−120 еўра ў год, наўрадці зможа паўплываць на колькасць электрамабіляў у краіне.
А як справы з электрамабілямі ў іншых краінах?
Украіна — збораў няма
Ва Украіне з першага студзеня 2018 года былі цалкам адменены мытныя пошліны і іншыя зборы пры ўвозе электракараў. Таму ўжо летам 2018 года электрамабіль на вуліцах Кіева — нярэдкая з’ява.
Вялікабрытанія — гранты на пакупку
Урад Вялікабрытаніі стымулюе куплю «зялёных» аўто грантам у памеры 35% ад кошту машыны і вызваляе ад падатку на ўласнасць. Па стане на канец 2017 года 5% з усяго транспарту ў Брытаніі заменена на электрычны.
Францыя — кампенсацыя
У Францыі электракараў больш за 100 000, або 1,2% усяго рынку. Пакупнікам такіх аўто ўрад кампенсуе 10 000 еўра.
Гэтыя краіны ўжо заявілі аб пераходзе на электракары да 2040 года. Да гэтага часу там плануецца ўвесці забарону на продаж новых аўтамабіляў з бензінавымі і дызельнымі рухавікамі. У Лондане ўжо ёсць першыя дзевяць вуліц, на якіх забаронена рухацца аўто з бензінавымі і дызельнымі рухавікамі.
Але Гродна, хутчэй за ўсё, у бліжэйшай перспектыве застанецца месцам, дзе зарадных станцый для электракараў больш чым іх саміх. Так будзе, не электрамабілі не танныя самі па сабе, а мытныя і іншыя зборы за ўвоз аўто ў Беларусь застаюцца высокімі.
