«Не 22, а 24. І не чэрвеня, а лютага. Не 1941, а 2022. Кіеў яшчэ не бамбяць. Пакуль. Але нам ужо абвясцілі, што пачалася… спецаперацыя. Насамрэч — вайна. Яшчэ ўчора ў яе ніхто не верыў», — піша ў сваём канале «Тётя Ира разрешила» рэдактарка Hrodna.life Ірына Новік.
Сёння наша рэдакцыя чытае не навіны, а зводкі — так называюць інфармацыю на вайне: «На Харкаўскім кірунку жорсткія баі». «Акупанты захапілі Паўночна-Крымскі канал і Кахоўскую ГЭС». «Усе, хто могуць трымаць зброю, уступайце ў шэрагі сілаў тэрытарыяльнай абароны».
Гэта вайна. Пакуль — вайна Расіі супраць Украіны. Лукашэнка абверг заяву ўкраінскай пагранслужбы, што беларускія войскі атакавалі мяжу разам з расійскімі.
«Мярзотнікі крайнія! — адазваўся ён пра ўкраінцаў. — Нашыя войскі ніякага ўдзелу не прымаюць у гэтай аперацыі». Але на той жа нарадзе Лукашэнка заявіў, што прызнанне «ЛНР» і «ДНР» стаіць «на парадку дня»: «У бліжэйшы час мы зробім так, як будзе трэба і нам, і Расіі».
Беларусы, ці гатовыя вы забіваць суседзяў? Гатовыя вашы маці атрымліваць «двухсотыя»? Гатовыя камандзіры адпраўляць салдат на смерць? Ці як на разгонах пратэстаў - усе будуць проста выконваць загад?
Сотня дэпутатаў з рэгіёнаў Расіі напісала адкрыты ліст да расіян: «Вайну можа спыніць толькі масавае народнае асуджэнне». Дэпутаты заклікаюць не ўдзельнічаць у агрэсіі адносна Украіны. Яны перакананыя, што «грамадзяне не давалі яму [Пуціну] такога мандата».
А грамадзяне Беларусі ўпаўнаважвалі Лукашэнкі прымаць такія рашэнні?
Вайна — канфлікт паміж палітычнымі ўтварэннямі - дзяржавамі, плямёнамі, палітычнымі групоўкамі, кажа Вікіпедыя. Я не хачу быць сябрам групоўкі або племя, не хачу мець нічога агульнага з вайной і тымі, хто яе навязвае і развязвае. Вайна — гэта разбурэнне сем’яў, чалавечых жыццяў, лёсаў, знішчэнне ўсяго найлепшага. Гэта самае страшнае лайно (аднолькава па-ўкраінску і па-беларуску, па-руску — «дерьмо»), якое толькі можа быць на свеце.
«У мяне ўвесь Тык-ток у вайне», — кідае лінк калега. На відэа — падпалены танк. Побач — забіты салдат. У каментары папярэджанне: «Слабанярвовым не глядзець».
Не. Глядзець усім. Хопіць быць слабанярвовым!
Асабліва шырока расплюшчыць вочы тым беларусам, хто звык верыць у мірнае неба над галавой як падарунак ад цяперашняй улады.
